Global texnologiya kompaniyalari 2026yilning dastlabki besh oyida 100 mingdan ortiq ish oʻrnini qisqartirdi. Bu haqda PinKod oʻrgangan Layoffs.fyi jonli trekeri maʼlumotlarida keltirilgan.

Qisqartirishlar texnologiyalarga boʻlgan talab kamaygani sababli yuz berayotgani yoʻq. Aksincha, yirik kompaniyalar xarajatlarini sunʼiy intellekt infratuzilmasi, data-markazlar, avtomatlashtirish vositalari va yuqori malakali AI mutaxassislariga yoʻnaltirmoqda. Natijada ayrim anʼanaviy lavozimlar qisqarmoqda, boshqaruv pogʻonalari optimallashtirilmoqda va kompaniyalar kamroq xodim bilan samaraliroq ishlashga urinmoqda.

Meta bu jarayonning eng yaqqol misollaridan biri boʻlib turibdi. Kompaniya taxminan 8 ming nafar xodimni, yaʼni ishchi kuchining qariyb 10 foizini qisqartirishni rejalashtirgan. Shu bilan birga, Meta AI infratuzilmasi va sunʼiy intellekt bilan bogʻliq yollashlarga xarajatlarni oshirishda davom etmoqda. Kompaniya taxminan 6 mingta ochiq vakansiyani toʻldirmasligi ham kutilmoqda. Bu esa Meta nafaqat mavjud ish oʻrinlarini qisqartirayotgani, balki ustuvor boʻlmagan yoʻnalishlarda kelajakdagi yollash surʼatini ham pasaytirayotganini koʻrsatadi.

Microsoft esa keskin ommaviy qisqartirish oʻrniga yumshoqroq yoʻlni tanlagan. Kompaniya AQShdagi taxminan 8 750 nafar xodimga ixtiyoriy ketish paketlarini taklif qilgan. Bu mamlakat boʻyicha Microsoft ishchi kuchining qariyb 7 foiziga teng. Shu bilan bir vaqtda kompaniya bulut infratuzilmasi, data-markazlar va Copilot kabi AI mahsulotlariga katta mablagʻ sarflashda davom etmoqda.

Amazon ham qisqartirishlar toʻlqinidan chetda qolmadi. Reuters xabariga koʻra, kompaniya soʻnggi oylarda taxminan 30 ming nafar korporativ xodimni ishdan boʻshatgan. Bu Amazon’ning ofis xodimlari tarkibining qariyb 10 foizini tashkil qiladi. Reuters, shuningdek, Amazon va Block kabi kompaniyalar ayrim qisqartirishlarni sunʼiy intellekt hisobiga samaradorlik oshgani bilan izohlaganini qayd etgan.

Oracle boʻyicha esa rasmiy raqamlar ochiqlanmagan. Shunga qaramay, bir qator nashrlar 2026 yil mart oyi oxirida kompaniyada taxminan 20–30 ming xodim ishdan boʻshatilgani haqida yozmoqda. Raqamlar rasman tasdiqlanmagani sababli Oracle misolida ehtiyotkorlik bilan yondashish zarur.

Bu jarayon faqat eng yirik texnologiya gigantlari bilan cheklanib qolmayapti. Freshworks ishchi kuchining 11 foizini, yaʼni taxminan 500 nafar xodimni qisqartirishini eʼlon qilgan. Kompaniya bu qarorni dasturiy taʼminot sohasida sunʼiy intellekt tez rivojlanayotgani bilan izohlagan. Freshworks rahbari Dennis Woodside’ning aytishicha, AI allaqachon kompaniya kodining yarmidan koʻprogʻini yozishda va odatiy ish jarayonlarini avtomatlashtirishda yordam bermoqda.

Coinbase ham ishchi kuchining taxminan 14 foizini, yaʼni 700 ga yaqin xodimni qisqartirishini eʼlon qilgan. Kompaniya buni kripto bozoridagi beqarorlik, xarajatlarni kamaytirish va biznesni “AI davri”ga moslashtirish zarurati bilan bogʻlagan.

Biroq ekspertlar bu holatni shunchaki “AI odamlarning ishini olib qoʻymoqda” degan xulosa bilan tushuntirish notoʻgʻri boʻlishini aytmoqda. Ayrim qisqartirishlar pandemiya davridagi haddan tashqari yollash, xarajatlarni kamaytirish zarurati, investorlar bosimi va AI tizimlarini yaratish uchun talab qilinadigan katta mablagʻlar bilan ham bogʻliq. Shunga qaramay, AI kompaniyalar uchun tezroq qayta tuzilish va kamroq xodim bilan koʻproq mahsuldorlikka erishish imkonini berayotgan asosiy omillardan biriga aylangan.

2026 yil boshidan beri AI toʻlqini taʼsirida texnologiya kompaniyalari 100 mingdan ortiq xodimni ishdan boʻshatdi