2025 yil 23 iyundan boshlab rasmiy daromadga ega boʻlmagan shaxslar uchun yangi kredit hisoboti – “Alternativ skoring” tizimi ishga tushadi. Bu haqda Kredit-axborot tahliliy markazi matbuot xizmati xabar berdi.

Mazkur tizim rasmiy daromadi qayd etilmagan fuqarolarga ham kredit olish imkoniyatini kengaytirishga xizmat qiladi. “Alternativ skoring” orqali fuqarolarning moliyaviy intizomi va toʻlov imkoniyati quyidagi mezonlar asosida baholanadi:

soʻnggi 12 oydagi bank kartasi orqali amalga oshirilgan tranzaksiyalar;
Majburiy ijro byurosidagi maʼlumotlar (shu jumladan, aliment toʻlovlari);
soʻnggi 12 oyda amalga oshirilgan kommunal toʻlovlar.

Mazkur maʼlumotlar asosida mijozning toʻlovga layoqatlilik darajasini ifodalovchi skoring bali shakllantiriladi. Banklar aynan shu bal asosida qarz ajratish yoki rad etish boʻyicha qaror qabul qiladi.

Xizmat narxi qancha?

“Alternativ skoring” hisoboti uchun bazaviy hisoblash miqdorining 0,05 barobari (QQSsiz) miqdorida toʻlov undiriladi. Bugungi kunda bu 18 750 soʻmni tashkil etmoqda. 2025 yil 1 avgustdan boshlab esa, BHM oʻzgarishi munosabati bilan narx 20 600 soʻmgacha oshadi.

Avvalroq Pinkod Markaziy bank tahliliga asoslanib, mahsulot xarid qilishda bank krediti va nasiya savdoning qaysi biri foydaliroq ekani yuzasidan tahliliy maqola eʼlon qilgan edi. Ushbu maqola bilan quyidagi havola orqali tanishish mumkin:

Bank krediti yoki nasiya savdo: qaysi biri haqiqatan ham foydaliroq?

Rasmiy daromadi yoʻq shaxslar uchun kredit olish yoʻllari kengaymoqda