Mikrokreditbank aksiyadorlarining 18 sentabr kuni oʻtkazilgan navbatdan tashqari umumiy yigʻilishida kuzatuv kengashi tarkibi yangilandi.

Aksiyadorlar Umidjon Muydinov, Behzod Hoshimov va Aram Kazaryanning kuzatuv kengashidagi vakolatlarini 18 sentabrdan muddatidan oldin tugatdi. Behzod Hoshimov bundan avval Biznesni rivojlantirish bank kuzatuv kengashiga kiritilgan edi.

Ularning oʻrniga hamda avvalroq boʻshagan yana bir oʻringa quyidagi toʻrt nafar mustaqil aʼzo uch yilga saylandi:

Danil Kerimi — Butunjahon intellektual mulk tashkilotining Mustaqil maslahat-nazorat qoʻmitasi raisi oʻrinbosari. Tashkilot maʼlumotlariga koʻra, Kerimi qoʻmitada Turkmaniston vakili sifatida faoliyat yuritadi.
Nizomiddin Murodov — AQShdagi “Insignia Financing” kompaniyasi boshqaruvchi direktori.
Ulf Vokurka — “Qozogʻiston temir yoʻli” milliy kompaniyasi direktorlar kengashi aʼzosi va mustaqil direktori. U mazkur lavozimda 2021 yildan buyon ishlaydi.
Mixayel Sarev — Oʻzbekistondagi “The Inter Board Academy” kompaniyasi direktori va muassisi.

Toʻrtala nomzod ham Mikrokreditbank aksiyalariga egalik qilmaydi. Ular Markaziy bank nomzodlarni kelishib berganidan keyingina kuzatuv kengashi aʼzosi sifatida ish boshlaydi.

Yangi aʼzolardan biri Giorgi Paresishvilining oʻrnini egallaydi. “Toshkent” fond birjasining sobiq rahbari boʻlgan Paresishvilining Mikrokreditbank kuzatuv kengashidagi vakolati 2025 yil 7 noyabrda muddatidan oldin tugatilgan edi.

Bank saytida qarordan oldingi sakkiz kishilik kuzatuv kengashi tarkibi koʻrsatilgan boʻlib, unda uch nafar mustaqil aʼzo mavjud edi. Qaror toʻliq kuchga kirgach, kengash toʻqqiz kishidan, jumladan, besh nafar mustaqil aʼzodan iborat boʻlishi kutilmoqda.

Mikrokreditbank deyarli toʻliq davlatga tegishli. Bank aksiyalarining 50,39 foizi Iqtisodiyot va moliya vazirligiga, 49,10 foizi Tiklanish va taraqqiyot jamgʻarmasiga qarashli. Ikki davlat aksiyadorining umumiy ulushi 99,49 foizni tashkil qiladi.

Mikrokreditbank kuzatuv kengashiga toʻrt nafar yangi mustaqil aʼzo saylandi