Yaqinda bir qator yirik banklar 2026 yil uchun oltin narxi boʻyicha prognozlarini yangiladi. Global iqtisodiy noaniqlik, markaziy banklarning faol xaridlari, geosiyosiy keskinliklar va AQSh dollarining zaiflashuvi fonida ayrim banklar bir unsiya oltin narxi $6 000 yoki undan yuqori boʻlishini kutmoqda.

6 000 dollar va undan yuqori prognozlar

J.P. Morgan — 2026 yil oxiri uchun oltin prognozini keskin oshirib, 6 300 dollar/unsiya deb belgiladi (avval ~5 000–5 055 dollar). Bankka koʻra, markaziy banklar (2026 yilda taxminan 800 tonna) va investorlar talabi kuchli boʻlib qoladi.

Oltin dollarga bogʻliq boʻlmagan, real aktiv sifatida zaxiralar va portfellarda muhim oʻrin egallamoqda. Bank 2026 yil yakunida oʻrtacha narx 5 055 dollar boʻlishini, 2027 yilda esa oʻsish davom etishini taxmin qilmoqda. Agar xususiy investorlar oltin sarmoyasini keskin oshirsa, uzoq muddatda 8 000–8 500 dollargacha chiqishi ham mumkin.

Ayni paytdagi jonli oltin narxi bilan quyida tanishish mumkin:

Jonli Oltin Narxi

Bank of America — eng dadil prognoz bilan chiqmoqda. Bankka koʻra, oltin 2026 yil bahoridayoq 6 000 dollarga yetishi mumkin. Bu baho avvalgi oltin oʻsish davrlaridagi tajribaga asoslanadi — tarixda oltin kuchli trendga kirgach, qisqa vaqt ichida tez koʻtarilgan. Stagflyatsiya xavfi, AQShning noanʼanaviy byudjet siyosati va investorlarning xavfsiz aktivlarga oʻtishi bu oʻsishni qoʻllab-quvvatlayotgani aytiladi.

Deutsche Bank — 2026 yilda oltin narxi $6 000/unsiya boʻlishini prognoz qilmoqda. Asosiy omillar sifatida markaziy banklar tomonidan barqaror talab va investorlarning dollardan tashqari aktivlarga oʻtishini keltiradi. Dollar zaiflashgan muhitda bu darajaga erishish mumkin, muqobil ssenariylarda esa narx $6 900 gacha chiqishi mumkin.

Société Générale — 2026 yil oxiriga $6 000/unsiya prognoz qilmoqda va agar xavfsiz aktivlarga oqim hamda dollar zaifligi hozirgi surʼatda davom etsa, bu baho ham konservativ boʻlishi mumkinligini taʼkidlaydi.

UBS — 2026 yil mart, iyun va sentabr oylariga moʻljallangan prognozini $6 200/unsiyaga oshirdi. Bank buni kutilganidan kuchliroq boʻlgan talab bilan izohlaydi.

6 000 dollardan pastroq prognozlar

Goldman Sachs — 2026 yil oxiri uchun prognozni 1 unsiya uchun 5 400 dollarga koʻtardi (avval 4 900 dollar). Bankga koʻra, xususiy investorlar va rivojlanayotgan davlatlar markaziy banklarining oltin xaridi talabni barqaror qilmoqda. Agar bu jarayon davom etsa, narx yanada yuqorilashi mumkin.

Morgan Stanley — asosiy qarash ehtiyotkor, ammo qulay sharoitda 2026 yil ikkinchi yarmida oltin 5 700 dollarga chiqishi mumkin. Oʻrtacha prognozlar 4 600–4 800 dollar atrofida. Xatarlar kamaysa, narx pasayishi ehtimoli ham bor.

HSBC — 2026 yil boshida oltin 5 000–5 050 dollarga yetishini kutmoqda. Biroq yil boʻyicha oʻrtacha narx 4 587 dollar, yil oxiri esa 4 450 dollar boʻlishi mumkin. Narxlar keskin tebranishi kutilmoqda.

Citi Bank — Uzoq muddatda ehtiyotkor pozitsiyada. Ayrim geosiyosiy va iqtisodiy xatarlar 2026 yilda yumshashi mumkin, bu narx oʻsishini cheklaydi. Ijobiy ssenariyda esa 2026 yil oxirida oltin 5 000 dollarga chiqishi mumkin.

Umuman olganda, ayrim banklar 6 000 dollardan yuqori baholarni aytayotgan boʻlsa-da, koʻpchilik oltin bozori uzoq muddatda oʻsish yoʻlida ekaniga ishonmoqda.

Yirik banklar: 2026 yilda oltin narxi 6 000 dollardan oshishi mumkin

Oltin narxi 2026 yilgacha 5 300 dollargacha koʻtarilishi mumkin — J.P. Morgan