Sud Meta va TikTok’ning quyi instansiya qarorini bekor qilish haqidagi shikoyatini rad etdi. Bu haqda Reuters xabar berdi.

Daʼvolar AQSh shtatlari, maktablar, mahalliy hokimliklar va alohida fuqarolar tomonidan kiritilgan. Ularning taʼkidlashicha, ijtimoiy tarmoqlarning ayrim funksiyalari yoshlarni platformada uzoqroq ushlab turishga moʻljallangan.

Daʼvogarlarga koʻra, bunday mexanizmlar bolalar va oʻsmirlar orasida xavotir, tushkunlik, oʻz tanasidan norozilik va boshqa ruhiy salomatlik muammolarini kuchaytirgan.

Federal sudlarga kiritilgan 3 mingdan ortiq ish Kaliforniyaning Oklend shahridagi sudda birlashtirilgan. Daʼvogarlar kompaniyalardan yetkazilgan zararni qoplash, jarimalar toʻlash va olingan daromadning bir qismini qaytarishni talab qilmoqda.

Shu bilan birga, shtatlar sudlarida ham yuzlab shunga oʻxshash daʼvolar mavjud. Kaliforniya shtati sudining oʻzida qariyb 3,3 mingta ish bitta jarayonga birlashtirilgan.

Apellyatsiya sudi Meta’ning 29 shtat bosh prokurori qoʻllab-quvvatlagan boshqa sud ishini kechiktirish haqidagi talabini ham rad etdi.

Ushbu ishda Meta bolalarning shaxsiy maʼlumotlarini noqonuniy yigʻish va ulardan foydalanish, yoshlarni ijtimoiy tarmoqlarda uzoqroq ushlab turadigan mexanizmlarni yaratish hamda platformalar xavfsizligi haqida foydalanuvchilarni chalgʻitishda ayblanmoqda.

Taqqoslash uchun, 2026 yil martida Los-Anjeles sudi Meta va Google’ni yosh foydalanuvchilarga zarar yetkazadigan platformalarni yaratishda ehtiyotsizlik qilgan deb topgan edi. Instagram va YouTube’dan bolaligidan foydalanib, keyinchalik ruhiy salomatlik muammolariga duch kelganini aytgan yosh ayolga 6 mln dollar tovon belgilangan.

Nyu-Meksiko sudi esa Meta faoliyatini jamoatchilikka zarar yetkazuvchi holat deb baholadi. Kompaniyaga oʻsmirlarning ruhiy salomatligini qoʻllab-quvvatlash jamgʻarmasiga 567 mln dollar toʻlash va yosh foydalanuvchilar uchun qoʻshimcha xavfsizlik choralarini joriy etish majburiyati yuklandi.

Ushbu ishning oldingi bosqichida Meta platformalar xavfsizligi haqida isteʼmolchilarni chalgʻitgan deb topilib, kompaniyaga yana 375 mln dollar toʻlash majburiyati yuklangan edi.

Meta va Google oʻzlariga qoʻyilgan ayblovlarni rad etmoqda hamda sud qarorlari ustidan shikoyat qilishini bildirgan.

Apellyatsiya sudining yangi qarori kompaniyalar aybdor deb topilganini anglatmaydi. Qaror ularga qarshi kiritilgan minglab daʼvolarni sudda koʻrib chiqishni davom ettirishga imkon beradi.

Meta, Google va TikTok ijtimoiy tarmoqlarga qaramlik boʻyicha 3 mingdan ortiq daʼvoga javob beradi