Amazon Web Services (AWS) — Amazon’ning bulutli hisoblash tizimidagi nosozlik tufayli butun dunyo boʻylab oʻnlab yirik vebsaytlar va ilovalarda uzilishlar kuzatildi.

Taʼsir koʻrsatgan platformalar qatoriga Snapchat, Roblox, Signal, Duolingo, Wordle, Coinbase, Slack, Pokémon Go, Epic Games, PlayStation Network va Peloton kiradi. Shuningdek, Amazon’ning oʻz xizmatlari, jumladan asosiy chakana savdo sayti hamda Ring eshik qoʻngʻirogʻi tizimlari ham ishdan chiqqan.

Buyuk Britaniyada esa Lloyds Bank, Bank of Scotland, HM Revenue and Customs vebsayti faoliyatida muammolar kuzatildi. Minglab foydalanuvchilar ilovalarga kira olmaganliklarini xabar qilishgan.

Buyuk Britaniyadagi The Chartered Institute for IT mutaxassisi, kiberxavfsizlik boʻyicha ekspert Patrik Burges bu holatni shunday izohladi:

“Bugungi kunda dunyo aholisining katta qismi atigi uch-toʻrt yirik bulutli hisoblash kompaniyasining infratuzilmasiga tayangan. Shu sababli shunday nosozliklar sodir boʻlganda, u juda keng koʻlamli onlayn xizmatlarga taʼsir koʻrsatishi mumkin”.

Amazon maʼlumotiga koʻra, nosozlik Virjiniya shtatida soat 12:00 (Toshkent vaqti) atrofida boshlangan. Kompaniya 14:30 da tizimda “tiklanish alomatlari sezilayotgani”ni maʼlum qildi va 15:00 ga kelib global xizmatlar qayta tiklanganini tasdiqladi.

Mutaxassislarning fikricha, bu holatga kiberhujum emas, balki texnik nosozlik boʻlgan.

Amazon serverlaridagi uzilishlar sababli dunyo boʻylab yirik ilova va veb-saytlar ishdan chiqdi