Prezidentning 23 iyundagi PF–115-son farmoni bilan ish haqi, pensiya, stipendiya va nafaqalar miqdorini oshirish belgilandi.

Farmonga koʻra, 2026 yil 1 iyuldan pensiya va nafaqalar, shuningdek, Ijtimoiy reyestrga kiritilgan oilalarga toʻlanadigan bolalar nafaqasi hamda moddiy yordam miqdorlari 7 foizga oshiriladi.

Xususan, yoshga doir eng kam pensiya miqdori oyiga 983 ming soʻm, nogironlik pensiyalarining eng kam miqdori esa 1 mln 83 ming soʻm etib belgilanadi.

Ijtimoiy reyestrga kiritilgan oilalarga bolalar nafaqasining oylik miqdori:

3 yoshgacha boʻlgan bitta farzand uchun — 386 ming soʻm;
3 yoshdan 18 yoshgacha boʻlgan bitta farzand uchun — 295 ming soʻm;
oilaning ikkinchi farzandi uchun qoʻshimcha — 177 ming soʻm;
uchinchi va undan keyingi har bir farzand uchun qoʻshimcha — 118 ming soʻm.

Bunday oilalarga beriladigan moddiy yordamning oylik miqdori 450 ming soʻmga yetkaziladi.

Shuningdek, 2026 yil 1 iyuldan pensiyani hisoblashning bazaviy miqdori oyiga 504 ming soʻm etib belgilanadi.

2026 yil 1-sentabrdan byudjet tashkilotlari xodimlarining ish haqi va stipendiyalar miqdori ham 7 foizga oshiriladi.

Hozirda bazaviy talabalar stipendiyasi 569 ming 670 soʻmni tashkil etadi. 7 foizlik oshirishdan keyin uning miqdori 609 ming 547 soʻmga yetadi.

Barcha fanlardan “5” baho olgan talabalarning amaldagi stipendiyasi 683 ming 604 soʻm boʻlib, 1-sentabrdan 731 ming 456 soʻmga oshadi.

Shu sanadan boshlab:

mehnatga haq toʻlashning eng kam miqdori oyiga 1 mln 360 ming soʻm;
bazaviy hisoblash miqdori 440 ming soʻm etib belgilanadi.

Oʻzbekistonda 1 iyuldan pensiya va nafaqalar, 1-sentabrdan esa ish haqi hamda stipendiyalar 7 foizga oshiriladi