Kredit — bu moliya tashkilotlari tomonidan maʼlum miqdordagi mablagʻni vaqtincha foydalanish uchun qarzga berish jarayoni. Kredit oluvchi belgilangan muddatda asosan asosiy qarzni va unga qoʻshimcha ravishda foiz toʻlashi zarur. Kreditlar turli maqsadlar, masalan, uy-joy sotib olish, avtomobil xaridi, biznesni rivojlantirish yoki shaxsiy ehtiyojlarni qoplash uchun ishlatiladi. Kredit turlari asosan 5 ta boʻlib, har biri aniq maqsadga yoʻnaltirilgan boʻladi.

Mikroqarz

Mikroqarz – bu kichik miqdordagi moliyaviy mablagʻ boʻlib, shaxsiy ehtiyojlarni qondirish, kutilmagan xarajatlarni qoplash yoki tadbirkorlik faoliyatini moliyalashtirish uchun ajratiladi. Ushbu moliyaviy vosita asosan moliyaviy imkoniyatlari cheklangan kishilar va kichik biznes egalariga moʻljallangan boʻlib, uni olish shartlari odatda yengilroq boʻladi.

Mavzuga doir: Mikroqarz nima va uni olishda qaysi jihatlarga eʼtibor berish kerak?

Avtokredit

Avtokreditlar yangi yoki ishlatilgan avtomobil xarid qilishni rejalashtirganlar uchun moʻljallangan. Kredit muddati davomida avtomobil garov sifatida qoladi. Odatda dastlabki toʻlov talab etiladi va toʻlovlar bir necha yilga boʻlib beriladi. Avtokreditning ommabopligi shaxsiy transport vositasiga ega boʻlishni istaganlar sonining ortishi bilan bogʻliq.

Taʼlim krediti

Taʼlim krediti oliy taʼlim olishni xohlagan yoshlar uchun muhim moliyaviy yordam vositasi hisoblanadi. Bu kredit turidan foydalanish orqali talabalar kontrakt toʻlovlarini amalga oshirishi mumkin. Imtiyozli davr mavjud boʻlib, asosiy qarzni toʻlash oʻqish muddati davomida kechiktiriladi. Taʼlim krediti hozirda ayollar uchun foizsiz, erkaklar uchun esa Markaziy bank foiz stavkasida (hozirda 13,5%) ajratiladi. Markaziy bank foiz stavkasi oʻzgarsa, kredit foiz stavkasi ham oʻzgaradi.

Isteʼmol krediti

Isteʼmol kreditlari – kundalik ehtiyojlarni qondirish uchun ajratiladigan kredit turi boʻlib, maishiy texnika, elektronika yoki boshqa zarur tovarlarni xarid qilish imkonini beradi. Bu kreditning afzalligi – nisbatan qisqa muddatli boʻlishi va tez rasmiylashtirilishidadir.

Ipoteka krediti

Ipoteka kreditlari uzoq muddatli va yirik moliyaviy majburiyat boʻlib, uy-joy sotib olishni xohlagan aholi uchun ajratiladi. Koʻchmas mulk kredit muddati davomida garov vazifasini bajaradi. Kredit muddati odatda 10-20 yilga moʻljallangan boʻlib, maʼlum dastlabki toʻlov talab qilinadi. Oʻz uyiga ega boʻlishni orzu qilganlar uchun ipoteka krediti eng maqbul moliyaviy yechimlardan biri sanaladi.

Mavzuga doir: Kredit olishdan avval nimalarga eʼtibor berish kerak?

Banklarda kreditlarning qanday turlari mavjud?