Markaziy bank Tezkor toʻlovlar tizimi orqali jismoniy shaxslar oʻrtasida mobil telefon raqami asosida pul oʻtkazish qoidalarini tasdiqladi. Hujjat 24 avgust kuni Adliya vazirligida 3930-son bilan davlat roʻyxatidan oʻtkazilgan va 26 noyabrdan kuchga kiradi.

Yangi tizimda pul qabul qiluvchining mobil telefon raqami uning bank hisobvaragʻiga bogʻlanadi. Shundan keyin unga mablagʻ yuborish uchun hisobvaraq yoki plastik karta rekvizitlarini bilish talab qilinmaydi. Buning uchun telefon raqamini kiritishning oʻzi kifoya boʻladi.

Bunda telefon raqami hisobvaraq egasining oʻz nomida rasmiylashtirilgan boʻlishi va bank mobil ilovasida roʻyxatdan oʻtgan raqam bilan mos kelishi kerak. Bogʻlash Bank depozitorlarining milliy axborotlar bazasi orqali amalga oshiriladi. Har bir bogʻlangan hisobvaraq uchun alohida “bogʻlash kodi” ham shakllantiriladi.

Bir bank doirasida bitta telefon raqamini faqat bitta hisobvaraqqa bogʻlash mumkin. Biroq bir xil raqam turli banklardagi hisobvaraqlarga bogʻlangan boʻlishi mumkin.

Bunday vaziyatda Tezkor toʻlovlar tizimi joʻnatuvchiga pul oluvchining hisobvaraqlari mavjud banklar haqidagi maʼlumotlarni chiqaradi va joʻnatuvchi kerakli bankni tanlaydi.

Shundan keyin tizim tanlangan bankdagi hisobvaraq rekvizitlarini avtomatik shakllantiradi. Pul joʻnatishdan oldin foydalanuvchiga oʻtkazma summasi, oluvchining F.I.Sh., uning banki hamda operatsiya uchun olinadigan komissiya koʻrsatilishi shart. Oʻtkazma faqat foydalanuvchining yakuniy tasdigʻidan keyin amalga oshiriladi.

Telefon raqamini hisobvaraqdan istalgan vaqtda mobil ilova orqali yoki bankka murojaat qilib uzish mumkin.

Bank ayrim holatlarda bogʻlanishni mijozning alohida topshirigʻisiz ham bekor qilishi mumkin. Masalan, telefon raqami boʻyicha mobil operator bilan shartnoma bekor qilinganda, mijoz ilovada boshqa raqamga oʻtganda yoki akkaunt oʻchirilishi bunga sabab boʻlishi mumkin. Bunday holatda bank mijozni keyingi ish kunidan kechiktirmay xabardor qilishi kerak.

Mobil ilovalar orqali oʻtkazmalar Tezkor toʻlovlar tizimida real vaqt rejimida va 24/7 amalga oshiriladi. Banklar operatsiyalar uchun shartnomada nazarda tutilgan komissiyani olishi mumkin, Markaziy bank esa moliyaviy xatarlarni kamaytirish maqsadida bunday oʻtkazmalarga limitlar belgilash huquqiga ega.

Endilikda telefon raqami orqali boshqa bankdagi hisobvaraqqa pul oʻtkazish mumkin boʻladi