Markaziy bank 27 avgust kuni “Yevroosiyo Banki” aksiyadorlik jamiyatidan bank faoliyatini amalga oshirish huquqini beruvchi litsenziyani chaqirib oldi.

Bank uchun ushbu litsenziya 2024 yil yanvarida taqdim qilingan edi. Regulyator litsenziya chaqirib olinishi sabablarini shunday izohladi:

“Bank tomonidan ustav kapitali miqdori qonunchilikda belgilangan eng kam talablarga muvofiqlashtirilmaganligi hamda banklar va bank faoliyati toʻgʻrisidagi qonunchilikda belgilangan boshqa talablar bajarilmaganligi sababli ushbu qaror qabul qilindi”

Markaziy bank qonunchilikka asosan bankni majburiy tugatish komissyasini tayinlash toʻgʻrisida qaror qabul qilganini maʼlum qildi.

Qozogʻistonning “Yevroosiyo Banki” 2024 yilda Oʻzbekistonda bank ochish uchun bir necha yillik urinishlardan keyin litsenziya olgan edi. Bankning Qozogʻistonda mijozlar bazasi katta, biroq Oʻzbekistonda toʻliq ish faoliyatini yoʻlga qoʻyish imkoni boʻlmadi.

Bank 2025 yilning birinchi yarmida 51,6 mlrd soʻm zarar koʻrib, mamlakatdagi eng koʻp zarar koʻrgan banklardan biriga aylangandi.

“Yevroosiyo Banki” tugatilmoqda: Markaziy bank litsenziyani chaqirib oldi