UZCARD kuzatuv kengashi raisi Akbar Akilov va yana ikki aʼzo lavozimini tark etdi
UZCARD toʻlov tizimi operatorining kuzatuv kengashi raisi Akbar Akilov va yana ikki aʼzoning vakolati tugatildi. Kuzatuv kengashiga kompaniya aksiyalarining 25 foiziga egalik qiluvchi Kamron Akbarov raislik qilmoqda.
“Yagona umumrespublika protsessing markazi” AJ (UZCARD) kuzatuv kengashi tarkibida oʻzgarishlar amalga oshirildi. Tegishli qaror 2026 yil 2 noyabr kuni aksiyadorlarning navbatdan tashqari umumiy yigʻilishida qabul qilingan.
Kompaniya tomonidan Openinfo portalida eʼlon qilingan maʼlumotga koʻra, kuzatuv kengashi raisi Akbar Akilov, shuningdek, kengash aʼzolari Aziz Yusupov va Ulugʻbek Sodiqovning vakolatlari tugatilgan.
Kuzatuv kengashiga yangi aʼzo sifatida “T-Y-Z GROUP” MChJ bosh direktori Jahongir Zaripov saylangan.
Shuningdek, kompaniya aksiyalarining 25 foiziga egalik qiluvchi Kamron Akbarov hamda “IMC-CAPITAL” MChJ investitsiya menejeri Jasur Tursunbayev kuzatuv kengashi tarkibiga qayta saylangan.
UZCARD rasmiy saytidagi yangilangan maʼlumotlarga koʻra, kuzatuv kengashi raisi lavozimini Kamron Akbarov egallagan.
Natijada UZCARD kuzatuv kengashi aʼzolari soni besh nafardan uch nafarga, yaʼni 40 foizga qisqargan. Yangi tarkibdagi kuzatuv kengashi raisi kim boʻlishi hozircha ochiqlanmagan.
UZCARD aksiyalarining 75 foizi “IMC-CAPITAL” MChJga, qolgan 25 foizi esa Kamron Akbarovga tegishli.
Kompaniya kuzatuv kengashi tarkibidagi oʻzgarishlar sabablarini ochiqlamagan.
