TikTok’da kuchaytirilgan ota-ona nazorati funksiyasi ishga tushirildi
Ota-onalar endilikda farzandlari platformada kimlarni kuzatishi, qancha vaqt oʻtkazishini bilishi, shuningdek kunning maʼlum vaqtida unga kirishni cheklab qoʻyishi mumkin boʻladi.
Xitoyning TikTok ijtimoiy tarmogʻi ota-ona nazorati va voyaga yetmaganlar xavfsizligiga qaratilgan bir qator muhim oʻzgarishlarni oʻz ichiga olgan katta yangilanishni taqdim qildi.
Endi ota-onalar farzandlarining obunachilari va kuzatuvchilarini koʻrish, shuningdek, farzandlari platformada kimlarni bloklangani haqida maʼlumot olish imkoniyatiga ega boʻladi.
Yangi “Time Away” funksiyasi yordamida ota-onalar farzandlari uchun TikTok ishlamaydigan aniq vaqtlarni, masalan, maktab soatlari yoki kechki paytlarda belgilashi mumkin, bu esa ekranga sarflanadigan vaqtni boshqarishda yordam beradi.
Kelgusi oylarda TikTok ota-onalarga farzandlari qaysi videolar haqida shikoyat qilgani toʻgʻrisida xabar beradi, bu esa farzandlarining platformadagi faoliyati haqida yanada yaxshiroq tasavvur hosil qilish imkonini beradi.
TikTok endi 16 yoshdan kichik foydalanuvchilarga kechqurun ilovani yopishni taklif qiladi. Agar bola soat 22:00 dan keyin TikTok’ni ochishga harakat qilsa, ilova yoqimli musiqa chalib, dam olishni eslatadi va sogʻlom turmush tarziga undaydi.
TikTok, shuningdek, texnologiya kompaniyalari foydalanuvchilarning yoshini tekshirish boʻyicha kuchaytirilgan nazoratga duchor boʻlayotgan bir paytda, yosh kafolati masalasiga eʼtibor qaratdi. Kompaniya 13 yoshdan kichik bolalarning roʻyxatdan oʻtishini oldini olish va oʻsmirlarning yoshiga mos tajribaga ega boʻlishini taʼminlash uchun sunʼiy intellektdan foydalanishini maʼlum qildi.
Maʼlumot uchun, TikTok hozirda Oʻzbekiston hududida bloklangan. Shunga qaramasdan kompaniya 2024 yilda xizmat koʻrsatish sohasidagi eng koʻp soliq toʻlagan top-10 xorijiy kompaniya roʻyxatiga kirgan edi.
