TBC Bank ustav kapitalini 340 mlrd soʻmga oshirmoqda
TBC Bank har birining nominal qiymati 1 ming soʻm boʻlgan 340 mln dona qoʻshimcha aksiya chiqaradi. Ularning barchasi yopiq obuna asosida bank aksiyadori — “TBC DIGITAL” AJga joylashtiriladi.
TBC Bank aksiyadorlari bank ustav kapitalini qoʻshimcha aksiyalar chiqarish hisobiga 340 mlrd soʻmga oshirishga qaror qildi.
Bankning 18 iyun kuni oʻtkazilgan navbatdan tashqari aksiyadorlar umumiy yigʻilishida 340 mln dona oddiy, egasining nomi yozilgan, hujjatsiz shakldagi aksiyalarni chiqarish maʼqullangan. Har bir aksiyaning nominal va joylashtirish qiymati 1 ming soʻm etib belgilangan.
Qoʻshimcha aksiyalarning barchasi yopiq obuna asosida bank aksiyadori — “TBC DIGITAL” AJga joylashtiriladi. Aksiyalar uchun toʻlov Oʻzbekiston milliy valyutasida, naqdsiz shaklda amalga oshiriladi.
Aksiyalar chiqarilishi davlat roʻyxatidan oʻtkazilgan kundan boshlab 30 kun ichida joylashtirilishi rejalashtirilgan. Jarayonga anderrayterlar jalb qilinmaydi.
Yigʻilishda, shuningdek, bank ustaviga tegishli oʻzgartirishlar kiritish va ularni davlat roʻyxatidan oʻtkazish toʻgʻrisidagi qarorlar ham tasdiqlangan.
