Polshada 30 iyundan boshlab tajriba tariqasida 4 kunlik ish haftasiga oʻtiladi

30 iyundan boshlab Polsha toʻrt kunlik ish haftasini toʻliq ish haqi saqlangan holda joriy etish boʻyicha tajriba loyihasini boshlaydi. Bu haqda UNN xabar berdi.

Loyiha mehnatni tashkil etishda moslashuvchan yondashuvni koʻzda tutadi va hayot sifatini oshirish, hissiy charchoqni kamaytirish hamda demografik inqirozga qarshi kurashishga yoʻnaltirilgan.

Ish beruvchilar ish jadvalining quyidagi shakllaridan birini mustaqil ravishda tanlashi mumkin: 

• Toʻrt kunlik ish haftasiga oʻtish
• Ish kunini 6 soatgacha qisqartirish 
• Pullik dam olish kunlari sonini koʻpaytirish

Kompaniyalar istasa, 5 kunlik ish haftasini saqlab qolgan holda xodimlarga qoʻshimcha dam olish kunlarini taklif etishi mumkin — bu kunlar soni har bir holatda alohida belgilanadi.

Biznes va davlat muassasalarining yangi tizimga moslashishini qoʻllab-quvvatlash maqsadida hukumat tashkilot ichidagi oʻzgarishlar uchun 1 million polsha zlotisigacha (taxminan 276 ming AQSh dollari) mablagʻ ajratadi. 

Rasmiylarning fikricha, haddan tashqari bandlik, ayniqsa bandlik darajasi Yevropada eng yuqori boʻlgan mamlakatlardan biri boʻlgan Polshada, oilaviy hayot va tugʻilish koʻrsatkichlariga salbiy taʼsir koʻrsatmoqda.

Tajriba asosida amalga oshiriladigan bosqich bir necha yil davom etishi mumkin va uning samaradorligi doimiy monitoring ostida boʻladi. Toʻliq qisqartirilgan ish haftasiga oʻtish 2027 yil noyabr oyigacha yakunlanishi rejalashtirilgan.

Islohotning asosiy maqsadi — ish va shaxsiy hayot oʻrtasida muvozanatni taʼminlash, ijtimoiy aloqalarni mustahkamlash va ishdan qoniqish darajasini oshirishdir.

Tashabbus birinchi navbatda Polsha fuqarolariga yoʻnaltirilgan. Kutilishicha, kelajakda bu model stressni kamaytirishga va tugʻilish koʻrsatkichlarini oshirishga xizmat qiladi.

Shunga oʻxshash tashabbuslar allaqachon Fransiya, Belgiya, Ispaniya va Skandinaviya mamlakatlarida ham amalga oshirilmoqda.