Oʻzbekiston fevral oyida jahondagi ikkinchi eng yirik oltin xaridori boʻldi
Jahon oltin kengashi hisobotiga koʻra, 2026 yil fevral oyida dunyo markaziy banklari jami 19 tonna oltin xarid qildi. Bu jarayonda Oʻzbekiston Markaziy bank yetakchi xaridorlardan biri boʻlib, oy davomida 8 tonna oltin sotib oldi.
Dunyo markaziy banklari 2026 yil fevral oyida 19 tonna oltin xarid qildi. Bu haqda World Gold Council hisobotida keltirib oʻtilgan. Oʻzbekiston esa bu jarayonda yetakchi xaridorlardan biri boʻldi.
Mazkur koʻrsatkich oʻtgan yilning shu davridagi 26 tonnalik xaridga nisbatan biroz past. Yil boshidan buyon ikki oy ichida markaziy banklar jami 25 tonna oltin sotib oldi. Bu esa oʻtgan yilning shu davridagi 50 tonna koʻrsatkichidan ancha past surʼatni koʻrsatadi.
Fevral oyidagi xaridlarning asosiy qismini Polsha milliy banki amalga oshirdi. Bank bir oyda 20 tonna oltin sotib oldi. Natijada mamlakatning oltin zaxiralari 570 tonnaga yetdi va jami zaxiralarning 31 foizini tashkil etdi. Bank oltin zaxiralarini 700 tonnaga yetkazish maqsad qilgan.
Oʻzbekiston esa mazkur oyda dunyo miqyosida ikkinchi eng yirik oltin xaridori boʻldi. Markaziy bank fevral oyida 8 tonna oltin xarid qilib, oʻz zaxiralarini 407 tonnaga yetkazdi. Bu mamlakatning jami zaxiralarining 88 foizini tashkil etadi. Yil boshidan buyon Oʻzbekiston jami 16 tonna oltin sotib olgan.
Malayziya Negera banki ham fevral oyida oltin xaridini davom ettirib, 2 tonna qoʻshimcha sotib oldi. Yil boshidan buyon bankning sof xaridlari 5 tonnani tashkil etadi.
Chexiya Milliy banki ham oltin zaxiralarini izchil oshirib bormoqda — hozirda bankning oltin zaxiralari 75 tonnaga, yaʼni jami zaxiralarning 7 foiziga yetgan.
Xuddi shunday holat Xitoy Xalq bankida ham kuzatilmoqda. Bank ketma-ket 16 oy davomida oltin sotib olib, zaxiralarini 2 308 tonnaga yoki jami zaxiralarning 10 foiziga yetkazdi.
Fevral oyida ayrim davlatlarda oltin zaxiralari kamaydi. Eng katta pasayish Turkiya (8 tonna) va Rossiya (6 tonna) hissasiga toʻgʻri keldi. Turkiya holatida kamayish markaziy bank zaxiralaridan koʻra, gʻaznachilik balansidagi oltin hajmining qisqarishi bilan bogʻliq boʻlishi mumkin.
