OKMK 2025 yilda 11,6 trln soʻm sof foyda oldi
OKMK 2025 yil yakunlariga koʻra 11,6 trln soʻm sof foyda qayd etdi. Kompaniya foydasi bir yil ichida 50,5 foizga oshgan boʻlsa, IV chorakdagi oʻsish 111 foizni tashkil etdi.
“Olmaliq kon-metallurgiya kombinati” AJ (OKMK) 2025 yil yakunlariga koʻra 11,6 trln soʻm sof foyda qayd etdi. Bu haqda KAP DEPO investitsiya kompaniyasi maʼlumot berdi.
Qayd etilishicha, mazkur koʻrsatkich 2024 yilning mos davriga nisbatan 50,5 foizga yuqori. Faqatgina IV chorak yakunlari boʻyicha korxonaning sof foydasi 3,3 trln soʻmni tashkil etib, yillik hisobda 111,1 foizga oshgan.
2025 yil holatiga koʻra, kompaniyaning taqsimlanmagan sof foydasi 15,9 trln soʻmga yetgan. Shu bilan birga, korxonaning jami aktivlari 86,4 trln soʻmni tashkil etmoqda.
Hisobot davrida eksport tushumi 510,4 mln dollarni tashkil etib, bu umumiy tushumning 12,1 foiziga teng boʻlgan. Taqqoslash uchun, 2024 yilning shu davrida eksport hajmi 610,9 mln dollarni (19,5 foiz) tashkil etgan.
Bundan tashqari, kompaniyaning uzoq muddatli kredit va qarzlari 1,6 trln soʻmga oshib, 28,5 trln soʻmga yetgan. Qisqa muddatli majburiyatlar esa aksincha 1,1 trln soʻmga kamayib, 2,5 trln soʻmni tashkil qilgan.
