Noyabr oyida Markaziy bank 4 ta bankka nisbatan jarima qoʻlladi
Bank nazorati qoʻmitasi noyabr oyida oʻtkazilgan yigʻilishlarda banklar va kredit tashkilotlari faoliyatiga oid 41 ta masalani muhokama qildi. Yigʻilishlar yakunida regulyator talablari hamda inspeksiya tekshiruvlari davomida aniqlangan qoidabuzarliklar uchun 4 ta bankka nisbatan jarima sanksiyalari qoʻllandi.
Markaziy bankning Bank nazorati qoʻmitasi noyabr oyida oʻtkazilgan yigʻilishlarda jami 41 ta masalani koʻrib chiqib, ular yuzasidan tegishli qarorlar qabul qildi. Bu haqda regulyator matbuot xizmati maʼlum qildi.
Xususan, roʻyxatga olish va ruxsat berish yoʻnalishida 31 ta masala muhokama qilindi. Ular doirasida kredit tashkilotlari ustaviga kiritilgan oʻzgartirishlarni roʻyxatdan oʻtkazish, yangi mikromoliya va kredit tashkilotlarini roʻyxatga olish, ayrimlarini reyestrdan chiqarish, shuningdek ustav fondidagi ulushga egalik qilish uchun ruxsat berish masalalari koʻrib chiqildi.
Bundan tashqari, banklarda auditorlik tekshiruvlarini oʻtkazish huquqi uchun sertifikatlar berish, banklar kuzatuv kengashi, boshqaruvi hamda muhim xodimlari lavozimlariga nomzodlarni koʻrib chiqish ishlari amalga oshirildi.
Shuningdek, kredit tashkilotlarining moliyaviy holatiga oid 10 ta masala muhokama qilindi. Unda Markaziy bank koʻrsatmalari va prudensial meʼyorlariga rioya etilishi, banklar hamda mikromoliya tashkilotlarida oʻtkazilgan inspeksiya tekshiruvlari natijalari, shuningdek bank xizmatlari isteʼmolchilarining huquqlarini himoya qilish bilan bogʻliq masalalar koʻtarildi.
Yigʻilishlarda jinoyat daromadlarini legallashtirish, terrorizmni moliyalashtirish hamda ommaviy qirgʻin qurollarini tarqatishni moliyalashtirishga qarshi kurashishga oid masalalar ham koʻrib chiqildi.
Natijada, oʻtgan oyda aniqlangan qoidabuzarliklar uchun 4 ta bankka nisbatan jarima sanksiyalari qoʻllanildi. Ushbu banklar regulyator talablari, inspeksiya tekshiruvlari hamda jinoyat daromadlarini legallashtirish va terrorizmga qarshi kurashish qoidalariga rioya etmagan.
Shuningdek, prudensial talablar buzilishi, faoliyatni qonunchilik talablariga moslashtirmaslik va inspeksiya tekshiruvlarida aniqlangan kamchiliklar sababli 1 ta mikromoliya hamda 1 ta toʻlov tashkilotiga nisbatan chora va sanksiyalar qoʻllanilishi toʻgʻrisida ogohlantirish berildi.
