Microsoft $4 trlnlik bozor qiymatiga erishgan ikkinchi kompaniyaga aylandi
31 iyul kuni Microsoft aksiyalari 4,5 foizga oshib, kompaniyaning birja bahosi $4 trlndan oshdi. Ushbu natija texnologiya gigantini Nvidia’dan keyin $4 trlnlik bahoga ega boʻlgan ikkinchi kompaniyaga aylantirdi.
Microsoft aksiyalari 31 iyul kuni keskin koʻtarilib, kompaniyaning bozor qiymatini $4 trlndan oshirdi. Bu natija uni tarixda bu marrani zabt etgan ikkinchi kompaniyaga aylantirdi.
Bozor ochilgach, Microsoft’ning (MSFT) aksiyalari deyarli 4,5 foizga koʻtarildi va kompaniyaning birja qiymati $4,01 trlnga yetdi. Umuman olganda, yil boshidan buyon Microsoft aksiyalari qariyb 28 foizga oshgan.
Microsoft ilk bor 1 trillion dollarlik bozor bahosiga 2019 yil aprelida yetgan edi. Biroq, Microsoft’ning 3 trlnlik marrani zabt etishi Nvidia va Apple’ga qaraganda uzoqroq vaqt oldi. Kompaniya bundan bir yarim yil oldin ushbu qiymatga chiqqan.
Endilikda Microsoft Nvidia’dan keyin 4 trillion dollarlik bahoga ega boʻlgan ikkinchi kompaniya. Nvidia ushbu marraga joriy yilning iyul oyi boshida yetgan edi.
Microsoft’ning OpenAI bilan qilgan milliardlab dollarlik hamkorligi oʻz samarasini bermoqda. ChatGPT 2022 yil oxirida taqdim etilganidan beri Microsoft aksiyalari ikki baravar oshgan. Kompaniya OpenAI’ning ilgʻor sunʼiy intellekt modellari orqali oʻzining Office dasturlari va Azure bulut xizmatlarini yanada kuchaytirmoqda.
Ayniqsa, Azure xizmatlarining daromadi sezilarli darajada oʻsdi. Tahlilchilar fikricha, Microsoft 365 dastur toʻplamiga joriy qilingan Copilot sunʼiy intellekt chatboti ham bu oʻsishda muhim rol oʻynagan.
Microsoft yangi moliyaviy yilning birinchi choragidayoq AI loyihalari uchun $30 mlrd sarflashni rejalashtirmoqda.
