Maskning Neuralink kompaniyasi yil oxirigacha insonga Blindsight koʻrish implantlarini oʻrnatadi
Taʼkidlanishicha, ushbu implantlar tugʻma koʻr insonlarga ham koʻrish imkoniyatini taqdim etishi mumkin.
Ilon Maskning Neuralink kompaniyasi 2025 yilda oʻzining innovatsion Blindsight chipini ilk bor inson miyasiga joylashtirishni rejalashtirmoqda. Bu tibbiyot sohasidagi ulkan yutuqlardan biri boʻlib, butunlay koʻr boʻlgan insonlarga atrof-muhitni koʻrish imkonini taqdim etadi.
Blindsight chipi miya ichidagi koʻrish korteksiga ulanadi va uni stimulyatsiya qiladi. Natijada inson ishlaydigan koʻz yoki optik nervlarga ehtiyoj sezmasdan tasvirlarni qabul qila oladi. Maskning taʼkidlashicha, agar insonning ikkala koʻzi va optik nervlari olib tashlangan boʻlsa ham, vizual korteksi sogʻlom boʻlsa, u koʻrish qobiliyatiga ega boʻlishi mumkin. Hattoki tugʻma koʻr boʻlgan insonlarga ham koʻrish imkoniyatini berishi ehtimoli mavjud.
Ilk bosqichda Blindsight chipi orqali koʻriladigan tasvir mukammal sifatga ega boʻlmaydi. Ilk foydalanuvchilar videooʻyinlarning dastlabki versiyalariga oʻxshash past aniqlikdagi tasvirni koʻrishlari mumkin. Biroq, Ne kelajakda ushbu chipni yanada rivojlantirib, tabiiy koʻrishdan ham yuqori sifatdagi tasvirlarni taqdim etishini maqsad qilgan. Hatto foydalanuvchilar infraqizil, ultrabinafsha va ehtimol radar toʻlqinlarini ham koʻra olishlari mumkin boʻladi.
2024 yil boshida Neuralink kompaniyasi ikkinchi bemorga miya chipini muvaffaqiyatli implantatsiya qilgan va unga videooʻyinlarni faqat oʻz fikrlari bilan oʻynash imkonini bergan edi. Endilikda kompaniya yana sakkiz nafar bemorga chip joylashtirishni rejalashtirmoqda.
