Markaziy bank firibgarlardan ogohlantirdi
Fuqarolarga ilovalarni esa messenjerlar orqali emas, balki rasmiy Google Play va App Store doʻkonlaridan oʻrnatish tavsiya etildi.
Bugungi kunda firibgarlar messenjerlar orqali fuqarolarga Markaziy bankning ramziy belgilari tushirilgan soxta hujjatlar yuborib, ularning mobil qurilmalariga zararli ilovalarni oʻrnatishga urinishmoqda.
Mazkur soxta hujjatlarda goʻyoki fuqaroning mablagʻlari xavfsizligini taʼminlash uchun “moliyaviy xavfsizlik boʻyicha mutaxassis” tomonidan ayrim amallar bajarilishi toʻgʻrisidagi yolgʻon axborot koʻrsatilgan.
Bu orqali “mutaxassis” niqobi ostidagi firibgar fuqaroning mobil qurilmasiga zararli ilovani (xususan, “Bezopasnost” nomli) oʻrnatish orqali ushbu qurilmadagi rasm va hujjatlar, SMS-xabarlar va qoʻngʻiroqlar haqidagi maʼlumotlarni yashirin tarzda qoʻlga kiritadi.
“Yuqoridagi kabi holatlarga duch kelsangiz, firibgarlarning aldovlariga aslo ishonmang, ilovalarni esa messenjerlar orqali emas, balki rasmiy Google Play va App Store doʻkonlaridan oʻrnating”, deyiladi Markaziy bank xabarida.
