Markaziy bank 6 ta bankka nisbatan jarima qoʻlladi
Qayd etilishicha, banklar jismoniy shaxslarga bank hisobvaraqlari ochish va ularni roʻyxatdan oʻtkazish boʻyicha belgilangan talablarni bajarmagan. Shuningdek, 3 ta lombard va 2 ta mikromoliya tashkilotiga nisbatan ham jarima sanksiyalari qoʻllanilgan.
Markaziy bank 6 ta bankka nisbatan jarima sanksiyasi qoʻlladi. Bu haqda regulyator matbuot xizmati xabar berdi.
Markaziy bankning Bank nazorati qoʻmitasi tomonidan 2025 yil aprel oyida oʻtkazilgan 8 ta yigʻilishda jami 45 ta masala koʻrib chiqildi va ularning barchasi boʻyicha tegishli qarorlar qabul qilindi.
Jumladan, roʻyxatga olish va ruxsat berish yoʻnalishida 26 ta masala koʻrib chiqilgan boʻlib, ular orasida kredit tashkilotlari ustaviga kiritilgan oʻzgartirishlarni roʻyxatdan oʻtkazish (4 ta), yangi mikromoliya tashkilotlarini hisob roʻyxatidan oʻtkazish (5 ta), ustav fondidagi ulushga egalik qilishga ruxsat berish (1 ta), auditorlik malaka sertifikati taqdim etish (1 ta), shuningdek, tijorat banklari kuzatuv kengashi va boshqaruv organlari hamda muhim ahamiyatga ega xodimlar nomzodlarini koʻrib chiqish (15 ta) kabi masalalar mavjud.
Bundan tashqari, Markaziy bankning prudensial meʼyorlari va koʻrsatmalariga rioya etilishi, tijorat banklari va mikromoliya tashkilotlarida oʻtkazilgan inspeksiyalar natijalari boʻyicha 19 ta masala muhokama qilindi.
Toʻlov tizimi operatori va toʻlov tashkilotlari tomonidan ustav kapitalining eng kam miqdorini shakllantirish hamda tashkiliy-huquqiy shaklni aksiyadorlik jamiyatiga oʻzgartirish boʻyicha qonunchilik talablari buzilgani aniqlanib, 1 ta toʻlov tizimi operatori va 3 ta toʻlov tashkilotiga ogohlantirish choralari va sanksiyalar qoʻllanildi.
Eng muhim jihatlardan biri shuki, oʻtkazilgan oʻrganishlar natijasida banklar tomonidan jismoniy shaxslarning hisobvaraqlarini ochish va roʻyxatdan oʻtkazish boʻyicha tartib buzilganligi aniqlangan. Bu holat boʻyicha 6 ta bank, 3 ta lombard va 2 ta mikromoliya tashkilotiga nisbatan jarima sanksiyalari qoʻllanilgan.
