KATM ilovasida kafil boʻlishdan oldin kredit tarixini tekshirish imkoni paydo boʻldi
Kredit byurosi maʼlumotiga koʻra, KATM mobil ilovasida kafil va kredit majburiyatlariga oid uchta yangi pullik xizmat joriy etildi.
Ular orqali foydalanuvchilar kredit tarixini tekshirish, kafillik majburiyatlarini nazorat qilish hamda muddati oʻtgan toʻlovlar boʻyicha maʼlumot olishi mumkin.
KATM mobil ilovasida foydalanuvchilar uchun uchta yangi pullik xizmat joriy etildi. Bu haqda kredit byurosi matbuot xizmati xabar berdi.
“Ishonchli kafil” xizmati
Ushbu xizmat kafil bo‘lishdan oldin qarz oluvchining kredit tarixini tekshirish imkonini beradi. Jumladan, uning amaldagi majburiyatlari, to‘lov intizomi hamda kredit skoring balli haqida ma’lumotlar taqdim etiladi. Xizmatdan foydalanish narxi — 8 240 so‘m.
“Kimga kafilman” xizmati
Mazkur xizmat orqali foydalanuvchi qaysi shaxslarga kafil ekanligini ko‘rishi, mavjud kafillik majburiyatlarini nazorat qilishi hamda yuzaga kelishi mumkin bo‘lgan moliyaviy xatarlarni baholashi mumkin. Xizmat narxi — 2 060 so‘m.
“Muddati o‘tgan to‘lovlar” xizmati
Ushbu xizmat asosiy qarzdorlik bo‘yicha 90 kundan ortiq kechiktirilgan to‘lovlar kredit tarixidan qachon chiqarilishi (o‘chirilishi) muddatini kuzatib borish imkonini beradi. Xizmatdan foydalanish qiymati — 4 120 so‘m.
