Fransiya Apple’ni 150 mln yevro jarimaga tortdi

Fransiya Raqobat Qoʻmitasi Apple’ga 150 million yevro (162 million dollar) miqdorida jarima solganini eʼlon qildi. Ushbu qarorga sabab sifatida Apple’ning App Tracking Transparency (ATT) funksiyasini joriy etish usuli bozor raqobatini buzishi koʻrsatildi.

Apple 2021-yil iOS 14.5 yangilanishi bilan ATT funksiyasini ishga tushirdi. Ushbu funksiya har qanday ilovani foydalanuvchini kuzatishdan oldin undan ruxsat soʻrashga majbur qiladi. Agar foydalanuvchi rozilik bermasa, ilovalar Identifier for Advertisers (IDFA) maʼlumotlaridan foydalana olmaydi. Bu esa shaxsiylashtirilgan reklamalarni joylashtirish imkoniyatini sezilarli darajada cheklaydi.

Fransiya regulyatori ATT tizimining oʻzi noqonuniy emasligini tan olsa-da, Apple uni raqobatchilar uchun murakkab va cheklovchi tarzda amalga oshirganini aniqladi. Apple oʻz reklamalarini iOS tizimiga bevosita integratsiya qilgan boʻlsa, uchinchi tomon ishlab chiquvchilar murakkab ruxsat olish jarayoni orqali cheklangan. Bu esa kichik nashirlar va reklama platformalariga zarar yetkazdi.

Fransiya regulyatori 2021-yilda Alliance Digitale va Internet Advertising Syndicate shikoyatlari asosida tekshiruv boshlagan edi. Natijada Apple 150 million yevro jarimaga tortildi va oʻz rasmiy saytida yetti kun davomida ushbu qarorni eʼlon qilishga majbur boʻldi. Biroq hukumat Apple’dan ATT funksiyasini oʻzgartirishni emas, balki faqat raqobat qonunchiligiga rioya qilishni soʻragan.

Fransiyaning ushbu qarori Apple’ga qarshi Yevropadagi tergovlar sonini oshirdi. Hozirda Germaniya, Italiya, Ruminiya va Polsha hukumatlari ATT tizimining raqobat qoidalariga zid kelishini tekshirishni boshlagan. Bu esa Apple uchun Yevropada yangi muammolarni yuzaga keltirishi mumkin.