Fitch NKMK va “Navoiyazot” reytinglari prognozini “ijobiy”ga koʻtardi

Fitch Ratings agentligi Oʻzbekistonning ikki yirik davlat kompaniyasi — Navoiy kon-metallurgiya kombinati va “Navoiyazot“ning uzoq muddatli kredit reytinglari boʻyicha prognozini “barqaror”dan “ijobiy”ga oʻzgartirdi. Reytinglarning oʻzi avvalgi darajada saqlab qolindi.

NKMKning uzoq muddatli emitent defolt reytingi “BB”, “Navoiyazot”niki esa “BB−” darajasida tasdiqlandi. Fitch qarorni 2026 yil 3 iyunda Oʻzbekiston suveren reytingi prognozining ham «barqaror»dan «ijobiy»ga yaxshilangani bilan izohladi.

Agentlik baholashiga koʻra, NKMKning mustaqil kredit profili “bb+” darajasiga teng. Biroq kompaniyaning yakuniy reytingi Oʻzbekistonning suveren reytingi bilan cheklangan. Bunga davlatning korxona boshqaruvi, soliqlar va dividendlar orqali uning moliyaviy oqimlariga sezilarli taʼsiri sabab boʻlmoqda.

NKMK Oʻzbekistonda ishlab chiqariladigan oltinning 80 foizdan ortigʻini taʼminlaydi va mamlakatning yirik soliq toʻlovchilaridan biri hisoblanadi. Kompaniya, shuningdek, dunyodagi eng yirik toʻrtta oltin ishlab chiqaruvchidan biri sanaladi.

“Navoiyazot”ning mustaqil kredit profili esa “b−” darajasida baholangan. Shunga qaramay, kompaniyaning davlat uchun strategik ahamiyati va hukumat tomonidan qoʻllab-quvvatlanishi hisobiga yakuniy reyting Oʻzbekiston suveren reytingidan atigi bir pogʻona past — “BB−” darajasida shakllangan.

Prognozning “ijobiy”ga oʻzgartirilishi reytinglar hozirning oʻzida oshirilganini anglatmaydi. Biroq Oʻzbekistonning suveren kredit reytingi yaxshilansa va kompaniyalarga davlat koʻmagi hozirgi darajada saqlansa, kelgusida NKMK hamda “Navoiyazot” reytinglari koʻtarilishi mumkin.