Eng koʻp ishlatiladigan PIN-kodlar

Data Genetics tomonidan oʻtkazilgan tadqiqotda 3,4 million PIN-kod tahlil qilingan boʻlib, natijada qiziqarli maʼlumotlar aniqlangan.

Eng mashhur PIN-kodlar

1234 PIN-kodi eng ommabop boʻlib, foydalanuvchilarning 11 foizi tomonidan tanlangan. Bu kombinatsiya PIN-kodlarning katta qismini tashkil etadi.

1111 kodi esa 6 foiz foydalanuvchi tomonidan tanlanadi. Bundan tashqari, 0000 PIN-kodi ham keng tarqalgan boʻlib, 2 foiz ulushga ega.

Yana bir qiziqarli kombinatsiya — 1212, uni 1,5-2 foiz foydalanuvchi tanlagan. Bundan tashqari, 6969, 7777, va 2222 kabi qaytariluvchi yoki koʻzga yoqimli raqamlar ham ancha ommabopdir.

Statistikaga koʻra, eng mashhur 20 ta PIN-kod barcha kodlarning 27 foizini tashkil qiladi. Bu esa tahdidlarga qarshi himoya zaifligini oshiradi, chunki firibgarlar bir necha urinishda ushbu kodlardan birini toʻgʻri topishi mumkin.

Eng kam tanlanadigan PIN-kodlar:

8068 eng kam ishlatiladigan PIN-kod boʻlib, deyarli hech kim bu kombinatsiyani tanlamagan. 8093, 7638, 8398, 0427 kabi kodlar ham juda kam foydalanuvchilar tomonidan tanlangan. Bundan koʻrish mumkinki, takrorlanmaydigan va muhim sanalarga bogʻliq boʻlmagan parollarni tanlash xavfsizlikni bir necha karra oshiradi.

Odamlar koʻpincha omadli raqamlar yoki madaniy ahamiyatga ega kombinatsiyalarni(masalan, mamlakat mustaqillik sanasi) tanlashadi, bu esa xakerlarga maʼlum mintaqalarda taxmin qilishni osonlashtiradi.

Kiberxavfsizlik mutaxassislariga koʻra, PIN-kodlarning 80 foizi zaif yoki keng tarqalgan kombinatsiyalar tufayli buziladi. Xakerlar avtomatlashtirilgan vositalar yordamida birinchi navbatda eng mashhur kombinatsiyalarni sinab koʻrishadi.

PIN-kod tanlashda nimalarga eʼtibor berish kerak?

1. Oddiy raqamlardan qochish. Ketma-ket raqamlar (1234 yoki 5678) va qaytariluvchi kombinatsiyalar (1111 yoki 5555) juda oson taxmin qilinadi.
2. Shaxsiy maʼlumotlarni ishlatmaslik. Tugʻilgan sanalar (masalan, 1990) yoki yillarni (2023) PIN-kod sifatida ishlatish tavsiya etilmaydi. Ular eng oson taxmin qilinadigan kombinatsiyalar hisoblanadi.
3. Tasodifiy, yagona kombinatsiyalarni tanlagan maʼqul. 4629 yoki 7042 kabi tasodifiy raqamlarni tanlash, taxmin qilish ehtimolini sezilarli kamaytiradi.
4. PIN-kodni tez-tez oʻzgartirib turish. PIN-kodni muntazam ravishda yangilash qoʻshimcha xavfsizlikni taʼminlaydi.