Birinchi yarim yillikda Oʻzbekiston banklarining jami kredit portfeli 575 trln soʻmga yetdi
2025 yil 1 iyul holatiga koʻra, Oʻzbekiston banklarining umumiy kredit portfeli 575,2 trillion soʻmga yetdi. Yil boshidan buyon ushbu koʻrsatkich 42,1 trillion soʻmga oshgan. Eng yuqori oʻsish Agrobank va Kapitalbankda kuzatildi.
2025 yil 1 iyul holatiga koʻra, Oʻzbekiston banklarining jami kredit portfeli 575,2 trillion soʻmni tashkil qilmoqda. Bu haqda Markaziy bank tomonidan eʼlon qilingan hisobotda keltirib oʻtilgan.
Yil boshidan buyon mamlakat banklarining umumiy kredit hajmi 42,1 trillion soʻmga oshgan.
Davlat banklari
Davlat banklari kredit portfeli hajmi boʻyicha yetakchilikni saqlab qolmoqda. Ushbu segmentdagi banklar tomonidan berilgan kreditlar umumiy qiymati 394,2 trillion soʻmni tashkil etdi. Bu koʻrsatkich yanvar oyiga nisbatan 27,5 trillion soʻmga koʻpaygan.
Davlat banklari orasida eng yirik kredit portfeli Oʻzbekiston Milliy bankiga (NBU) tegishli boʻlib, uning hajmi 109,3 trillion soʻmga yetgan. Bu yil boshiga nisbatan 1,3 trillion soʻmlik oʻsishni anglatadi.
Kredit portfeli boʻyicha ikkinchi oʻrinni esa Agrobank egalladi. Bankning ajratgan faol kreditlari 14,5 trillion soʻmga oshib, jami 73,9 trillion soʻmga yetdi. Shu tariqa bank avval ikkinchi oʻrinda boʻlgan Oʻzsanoatqurilishbank (SQB)ni ortda qoldirdi.
Shuningdek, Aloqabank(+2,8 trillion soʻm) va Xalq bankida (+2,3 trillion soʻm) ham sezilarli oʻsish kuzatilgan. Umuman olganda, davlatga tegishli boʻlgan barcha 9 ta bankda kredit portfeli oʻsishi kuzatilgan.
Boshqa banklar
Davlat ulushiga ega boʻlmagan banklar segmentida ham ijobiy dinamika kuzatildi. Ularning umumiy kredit portfeli 14,6 trillion soʻmga oshib, 181 trillion soʻmni tashkil qildi.
Bu toifadagi banklar ichida Ipoteka bank 35,1 trillion soʻm bilan yetakchilik qilmoqda. Biroq ushbu bankda yil boshiga nisbatan 28 milliard soʻmlik pasayish qayd etilgan.
Xususiy banklar orasida eng katta oʻsish Kapitalbank hissasiga toʻgʻri keldi. Uning kredit portfeli 3,5 trillion soʻmga oshib, 35,3 trillion soʻmga yetgan.
Shuningdek, TBC Bank (+3 trillion soʻm), Hamkorbank (+1,7 trillion soʻm), Hayotbank (+1,6 trillion soʻm) va Anorbank (+1,5 trillion soʻm) kredit portfellari ham sezilarli darajada kengaygani bilan ajralib turdi.
