AQShda yashash uchun “oltin” viza joriy etilishi mumkin
Mazkur viza “oltin karta” deb nomlanib, nafaqat AQShda yashash va ishlash huquqini beradi, balki fuqarolikni olishga ham yoʻl ochadi.
AQShda $5 mln evaziga xarid qilish imkoniyati mavjud boʻlgan “oltin” viza tizimi joriy etiladi. Prezident Donald Tramp seshanba kuni boʻlib oʻtgan matbuot anjumanida mazkur tashabbusni ilgari surdi.
Tramp jurnalistlarga AQShda ish oʻrinlarini yaratadigan yoki saqlab qoladigan katta miqdordagi mablag‘ga ega xorijiy investorlarga doimiy yashash huquqini beradigan “EB-5” immigratsion investor vizasi dasturini "oltin karta" deb nomlangan yangi tizim bilan almashtirishini maʼlum qildi.
“Biz oltin karta sotamiz”, — dedi Tramp. “Ushbu kartaning narxi taxminan 5 million dollarni tashkil qiladi”.
Mazkur viza nafaqat AQShda yashash va ishlash huquqini beradi, balki fuqarolikni olishga ham yoʻl ochadi. Savdo vaziri Xovard Lutnikning soʻzlariga koʻra, “Tramp oltin kartasi” ikki hafta ichida EB-5 vizalari oʻrnini egallaydi. U shuningdek, eski viza tizimini samarasiz deb atadi.
EB-5 vizalari dasturi 1990 yilda Kongress tomonidan xorijiy investitsiyalarni jalb etish maqsadida joriy etilgan boʻlib, kamida 1 million dollar sarmoya kiritib, 10 kishini ish bilan taʼminlay oladigan tadbirkorlarga AQShda yashash huquqini berardi.
Tramp, shuningdek, rossiyalik oligarxlar ham ushbu oltin kartani qoʻlga kiritishi mumkinligini inkor qilmadi.
Mavzuga doir: $TRUMP memkoini ortidan 800 mingdan koʻproq foydalanuvchi $2 milliard yoʻqotdi.
