AQShda Fed asosiy stavkani 9 oy ichida ilk marotaba pasaytirdi

AQShda Federal rezerv tizimi asosiy foiz stavkasini pasaytirdi.

Bu 9 oy ichidagi birinchi amalga oshirilgan pasayish boʻlib, sabab sifatida ishsizlikning oshib borayotgani koʻrsatilmoqda. AQSh Markaziy banki mehnat bozorida qora tanlilar orasida ishsizlik koʻpayishi, ish haftasining qisqarishi va boshqa zaiflik belgilarini qayd etdi. Shu sabab, kelgusida ham yana pasayishlar kutilmoqda.

Qaror prezident Donald Tramp talab qilgan yoʻnalishga mos boʻldi, biroq u soʻragan keskinroq pasayishlardan ancha yengilroqdir. Yangi Fed aʼzosi Stiven Miran esa yanada katta pasayish tarafdori boʻlib, qarorga qarshi ovoz bergan yagona shaxs boʻldi.

Fed raisi Jerom Pauell asosiy foiz stavkasi chorak foiz punktga tushirilib, 4,00–4,25% oraliqqa keltirilganini bildirdi. Uning soʻzlariga koʻra, oktabr va dekabr oylarida ham pasayish boʻlishi mumkin. Fed raisi hozirgi asosiy masala — mehnat bozorining zaiflashib borishi ekanligini aytdi.

“Xavfsiz yoʻl yoʻq. Qaysi yoʻlni tanlash kerakligi ham aniq emas. Biz inflyatsiyani ham hisobga olishimiz kerak, lekin bandlikni ham eʼtiborsiz qoldirolmaymiz”, — dedi Pauell

Pauellning fikricha, ish oʻrinlari yaratilish surʼati endi ishsizlikni barqaror ushlab turishga yetmayapti. Korxonalar esa deyarli yangi ishchi olmayapti. 

“Koʻryapmizki, ozchiliklarda ishsizlik ortmoqda. Yoshlarda ham iqtisodiy vaziyatdan koʻproq zarar koʻrish holati bor. Yangi ish oʻrinlarining kamligi mehnat bozorining zaiflashayotganini koʻrsatmoqda. Bizga endi bundan ortiq susayish kerak emas”, — dedi u.

Yoz davomida Fed siyosatini asta-sekin oʻzgartirdi. Tramp maʼmuriyati kiritgan yuqori bojlar doimiy inflyatsiya keltirib chiqarmasligi aniq boʻldi. Narxlar yil oxirigacha biroz tezroq koʻtarilishi mumkin, lekin keyinchalik bosim kamayadi. Shu bilan birga, mehnat bozoridagi zaiflik belgilari koʻpaymoqda, ish oʻrinlari oʻsishi esa deyarli toʻxtab qolgan.