Сандро Ртвеладзе Ипотека-банк OTP Group бошқарув раиси лавозимидаги фаолиятини якунламоқда. Банк хабарига кўра, у 2026 йил 1 июлдан бошлаб ушбу лавозимдан кетади.

Ртвеладзе банкка OTP Group кириб келганидан кейинги ўтиш даврида раҳбарлик қилди. Ипотека-банкнинг OTP Group томонидан сотиб олиниши Ўзбекистонда давлат банкининг илк хусусийлаштирилиши бўлиб, йирик Европа банк гуруҳининг мамлакат молия бозорига киришига йўл очган.

Банк маълумотида қайд этилишича, унинг раҳбарлиги даврида Ипотека-банкда бизнес жараёнлар қайта ташкил этилган, капитал базаси мустаҳкамланган, активлар сифати яхшиланган ва рентабеллик тикланган. Шунингдек, банк рискларни бошқариш, самарадорлик ва даромадлилик бўйича OTP Group стандартларига мослаштирилган.

Сандро Ртвеладзе банк секторида халқаро тажрибага эга мутахассис ҳисобланади. Ртвеладзе 2020 йилда TBC Bank Uzbekistan’да Бошқарув раиси сифатида ишлаган. У раҳбарлик қилган даврда TBC UZ Ўзбекистонда банк лицензиясини олган.

Кейинчалик у OTP Bank’нинг Россиядаги шўъба банкида бош директор ўринбосари бўлган. Шунингдек, технология, трансформация ва стратегия бўйича CEO маслаҳатчиси сифатида ҳам фаолият юритган.

2023 йил июл ойида у Ипотека-банк OTP Group’га бошқарув раиси ўринбосари, стратегия ва молия блоки раҳбари сифатида қўшилган. 2023 йил сентябридан эса банкнинг трансформация дастури учун масъул бўлган.

2024 йил сентябрида Сандро Ртвеладзе Ипотека-банк OTP Group бошқарув раиси этиб тайинланган.

Ипотека-банк OTP Group кузатув кенгаши раиси ва OTP Group бош директорининг ўринбосари Ласло Волф Ртвеладзенинг икки йил ичида банкда кенг қамровли трансформацияни амалга оширгани, банк фаолиятини OTP Group стандартларига мослаштиргани ва келгуси ривожланиш учун бошқарув жамоасини шакллантирганини қайд этди.

Ртвеладзенинг ўзи эса банкдаги фаолиятини якунлар экан, OTP Group раҳбарияти ва Ипотека-банк жамоасига миннатдорчилик билдирган. Унинг айтишича, шу вақт давомида эришилган натижалар жамоавий меҳнат маҳсули бўлган:

“OTP Group раҳбариятига ушбу муҳим даврда банкка раҳбарлик қилиш имконияти ва билдирган ишончи учун, шунингдек, Ипотека-банк OTP Group’даги жамоамга улкан меҳнати учун миннатдорчилик билдираман. Шу вақт мобайнида эришилган барча ютуқлар жамоавий меҳнатимиз самарасидир ва айнан мана шу жамоа банк ривожланишини давом эттиради”, — дейди Ртвеладзе.

Ипотека-банк Бошқарув раиси Сандро Ртвеладзе 1 июлдан лавозимини тарк этади