30 июндан бошлаб Полша тўрт кунлик иш ҳафтасини тўлиқ иш ҳақи сақланган ҳолда жорий этиш бўйича тажриба лойиҳасини бошлайди. Бу ҳақда UNN хабар берди.

Лойиҳа меҳнатни ташкил этишда мослашувчан ёндашувни кўзда тутади ва ҳаёт сифатини ошириш, ҳиссий чарчоқни камайтириш ҳамда демографик инқирозга қарши курашишга йўналтирилган.

Иш берувчилар иш жадвалининг қуйидаги шаклларидан бирини мустақил равишда танлаши мумкин:

Тўрт кунлик иш ҳафтасига ўтиш
Иш кунини 6 соатгача қисқартириш
Пуллик дам олиш кунлари сонини кўпайтириш

Компаниялар истаса, 5 кунлик иш ҳафтасини сақлаб қолган ҳолда ходимларга қўшимча дам олиш кунларини таклиф этиши мумкин — бу кунлар сони ҳар бир ҳолатда алоҳида белгиланади.

Бизнес ва давлат муассасаларининг янги тизимга мослашишини қўллаб-қувватлаш мақсадида ҳукумат ташкилот ичидаги ўзгаришлар учун 1 миллион полша злотисигача (тахминан 276 минг АҚШ доллари) маблағ ажратади.

Расмийларнинг фикрича, ҳаддан ташқари бандлик, айниқса бандлик даражаси Европада энг юқори бўлган мамлакатлардан бири бўлган Полшада, оилавий ҳаёт ва туғилиш кўрсаткичларига салбий таъсир кўрсатмоқда.

Тажриба асосида амалга ошириладиган босқич бир неча йил давом этиши мумкин ва унинг самарадорлиги доимий мониторинг остида бўлади. Тўлиқ қисқартирилган иш ҳафтасига ўтиш 2027 йил ноябрь ойигача якунланиши режалаштирилган.

Ислоҳотнинг асосий мақсади — иш ва шахсий ҳаёт ўртасида мувозанатни таъминлаш, ижтимоий алоқаларни мустаҳкамлаш ва ишдан қониқиш даражасини оширишдир.

Ташаббус биринчи навбатда Полша фуқароларига йўналтирилган. Кутилишича, келажакда бу модель стрессни камайтиришга ва туғилиш кўрсаткичларини оширишга хизмат қилади.

Шунга ўхшаш ташаббуслар аллақачон Франция, Белгия, Испания ва Скандинавия мамлакатларида ҳам амалга оширилмоқда.

Полшада 30 июндан бошлаб тажриба тариқасида 4 кунлик иш ҳафтасига ўтилади