Data Genetics томонидан ўтказилган тадқиқотда 3,4 миллион PIN-код таҳлил қилинган бўлиб, натижада қизиқарли маълумотлар аниқланган.

Энг машҳур PIN-кодлар

1234 PIN-коди энг оммабоп бўлиб, фойдаланувчиларнинг 11 фоизи томонидан танланган. Бу комбинация PIN-кодларнинг катта қисмини ташкил этади.

1111 коди эса 6 фоиз фойдаланувчи томонидан танланади. Бундан ташқари, 0000 PIN-коди ҳам кенг тарқалган бўлиб, 2 фоиз улушга эга.

Яна бир қизиқарли комбинация — 1212, уни 1,5-2 фоиз фойдаланувчи танлаган. Бундан ташқари, 6969, 7777, ва 2222 каби қайтарилувчи ёки кўзга ёқимли рақамлар ҳам анча оммабопдир.

Статистикага кўра, энг машҳур 20 та PIN-код барча кодларнинг 27 фоизини ташкил қилади. Бу эса таҳдидларга қарши ҳимоя заифлигини оширади, чунки фирибгарлар бир неча уринишда ушбу кодлардан бирини тўғри топиши мумкин.

Энг кам танланадиган PIN-кодлар:

8068 энг кам ишлатиладиган PIN-код бўлиб, деярли ҳеч ким бу комбинацияни танламаган. 8093, 7638, 8398, 0427 каби кодлар ҳам жуда кам фойдаланувчилар томонидан танланган. Бундан кўриш мумкинки, такрорланмайдиган ва муҳим саналарга боғлиқ бўлмаган паролларни танлаш хавфсизликни бир неча карра оширади.

Одамлар кўпинча омадли рақамлар ёки маданий аҳамиятга эга комбинацияларни(масалан, мамлакат мустақиллик санаси) танлашади, бу эса хакерларга маълум минтақаларда тахмин қилишни осонлаштиради.

Киберхавфсизлик мутахассисларига кўра, PIN-кодларнинг 80 фоизи заиф ёки кенг тарқалган комбинациялар туфайли бузилади. Хакерлар автоматлаштирилган воситалар ёрдамида биринчи навбатда энг машҳур комбинацияларни синаб кўришади.

PIN-код танлашда нималарга эътибор бериш керак?

Оддий рақамлардан қочиш. Кетма-кет рақамлар (1234 ёки 5678) ва қайтарилувчи комбинациялар (1111 ёки 5555) жуда осон тахмин қилинади.
Шахсий маълумотларни ишлатмаслик. Туғилган саналар (масалан, 1990) ёки йилларни (2023) PIN-код сифатида ишлатиш тавсия этилмайди. Улар энг осон тахмин қилинадиган комбинациялар ҳисобланади.
Тасодифий, ягона комбинацияларни танлаган маъқул. 4629 ёки 7042 каби тасодифий рақамларни танлаш, тахмин қилиш эҳтимолини сезиларли камайтиради.
PIN-кодни тез-тез ўзгартириб туриш. PIN-кодни мунтазам равишда янгилаш қўшимча хавфсизликни таъминлайди.

Энг кўп ишлатиладиган PIN-кодлар