Fitch Ratings агентлиги Ўзбекистоннинг икки йирик давлат компанияси — Навоий кон-металлургия комбинати ва “Навоийазот“нинг узоқ муддатли кредит рейтинглари бўйича прогнозини “барқарор”дан “ижобий”га ўзгартирди. Рейтингларнинг ўзи аввалги даражада сақлаб қолинди.

NKMKнинг узоқ муддатли эмитент дефолт рейтинги “BB”, “Навоийазот”ники эса “BB−” даражасида тасдиқланди. Fitch қарорни 2026 йил 3 июнда Ўзбекистон суверен рейтинги прогнозининг ҳам «барқарор»дан «ижобий»га яхшилангани билан изоҳлади.

Агентлик баҳолашига кўра, NKMKнинг мустақил кредит профили “bb+” даражасига тенг. Бироқ компаниянинг якуний рейтинги Ўзбекистоннинг суверен рейтинги билан чекланган. Бунга давлатнинг корхона бошқаруви, солиқлар ва дивидендлар орқали унинг молиявий оқимларига сезиларли таъсири сабаб бўлмоқда.

NKMK Ўзбекистонда ишлаб чиқариладиган олтиннинг 80 фоиздан ортиғини таъминлайди ва мамлакатнинг йирик солиқ тўловчиларидан бири ҳисобланади. Компания, шунингдек, дунёдаги энг йирик тўртта олтин ишлаб чиқарувчидан бири саналади.

“Навоийазот”нинг мустақил кредит профили эса “b−” даражасида баҳоланган. Шунга қарамай, компаниянинг давлат учун стратегик аҳамияти ва ҳукумат томонидан қўллаб-қувватланиши ҳисобига якуний рейтинг Ўзбекистон суверен рейтингидан атиги бир поғона паст — “BB−” даражасида шаклланган.

Прогнознинг “ижобий”га ўзгартирилиши рейтинглар ҳозирнинг ўзида оширилганини англатмайди. Бироқ Ўзбекистоннинг суверен кредит рейтинги яхшиланса ва компанияларга давлат кўмаги ҳозирги даражада сақланса, келгусида NKMK ҳамда “Навоийазот” рейтинглари кўтарилиши мумкин.

Fitch NKMK ва “Навоийазот” рейтинглари прогнозини “ижобий”га кўтарди