Истиқболли лойиҳалар миллий агентлиги “Капитал Суғурта” АЖнинг суғурта фаолияти бўйича лицензиясини 26 августдан бошлаб 10 кун муддатга тўхтатди.

Шу даврда компания янги суғурта ва қайта суғурта шартномаларини туза олмайди ҳамда амалдаги шартномаларни узайтира олмайди. Агентлик лицензия нега тўхтатилганига оид аниқ қоидабузарликни очиқламаган.

NAPP маълумотига кўра, гап компанияга 2022 йил 22 ноябрда берилган 049696-сонли лицензия ҳақида кетмоқда. Лицензия “Суғурта фаолияти тўғрисида”ги ҳамда “Лицензиялаш, рухсат бериш ва хабардор қилиш тартиб-таомиллари тўғрисида”ги қонунлар асосида вақтинча тўхтатилган.

Чеклов фақат янги шартномалар ва мавжуд полисларни узайтиришга тааллуқли. “Капитал Суғурта” илгари тузилган суғурта ва қайта суғурта шартномалари бўйича зиммасига олган мажбуриятларини бажаришда давом этиши керак.

Қонунчиликка кўра, ваколатли орган лицензияни 10 кунгача муддатга ўзи тўхтатиб туриши мумкин. Бунга лицензия талаблари ва шартлари бузилгани аниқланиши ёки регуляторнинг қоидабузарликларни бартараф этиш ҳақидаги талаби бажарилмаслиги асос бўлиши мумкин. Бироқ NAPPнинг “Капитал Суғурта” бўйича эълонида айнан қайси ҳолат сабаб бўлгани кўрсатилмаган.

“Капитал Суғурта” бозордаги йирик компаниялардан бири ҳисобланади. NAPPнинг 2026 йил биринчи чорак якунларига оид маълумотларига кўра, компания 211,1 млрд сўмлик соф суғурта мукофоти йиғиб, умумий суғурта сегментида тўртинчи ўринни эгаллаган. Бу кўрсаткич бир йил аввалгига нисбатан қарийб 2,5 баравар ёки 149,7 фоизга ошган.

Компаниянинг умумий суғурта мукофотлари эса биринчи чоракда 215,7 млрд сўмни ташкил этиб, йиллик ҳисобда 95 фоизга кўпайган. “Капитал Суғурта”нинг соф мукофотлари бутун умумий суғурта бозорининг қарийб 7,4 фоизига тенг бўлган.

“Капитал Суғурта” лицензияси 10 кунга тўхтатилди