“Инфинбанк”нинг асосий акциядори ҳисобланган Фарҳод Мамажонов ҳаво транспорти соҳасида фаолият юритувчи янги компания ташкил этди. Бу ҳақда банкнинг аффилланган шахслари рўйхатига киритилган ўзгаришлардан маълум бўлди.

Янги компания “Safo Airlanes” МЧЖ номи билан 7 май куни давлат рўйхатидан ўтказилган. Компаниянинг асосий фаолият тури ҳаво транспорти соҳасидаги ёрдамчи хизматлар кўрсатиш этиб белгиланган.

Компания устав капиталида қуйидаги шахслар улушга эга:

Фарҳод Фахритдинович Маматджанов — 60 фоиз;
Михаил Аленкин — 30 фоиз;
Авазжон Тошпўлатов — 10 фоиз.

Фарҳод Мамажонов Инфинбанк, Uztex Tashkent ва Rakat Plaza каби йирик корхоналар билан боғлиқ тадбиркор сифатида тилга олинади.

“Инфинбанк” расмий сайтида келтирилган маълумотларга кўра, Фарҳод Мамажонов банкнинг 43,6 фоизлик улуши билан асосий акциядори ҳисобланади. Банкнинг қолган акциялари “Престиж Риэлт” МЧЖга — 24,45 фоиз, “Тадбиркорликни ривожлантириш компанияси” АЖга — 22,9 фоиз, “Azia Trans Terminal” МЧЖга — 6,26 фоиз ва Парвиз Абдусаматовга — 2,8 фоиз миқдорида тегишли.

Аввалроқ “Тадбиркорликни ривожлантириш компанияси” АЖ Инфинбанк устав капиталидаги улушини 23 фоизгача оширгани маълум қилинганди. 2025 йил 29 декабрь куни банкнинг 10 фоиздан ортиқ улушга эга акциядорлари рўйхатида ўзгаришлар қайд этилган.

Компаниянинг “Инфинбанк” устав капиталига кириши 2025 йил октабр ойида амалга оширилган бўлиб, дастлаб 15 фоиз акция сотиб олинган. Кейинчалик ушбу улуш 19 фоизгача оширилган. Декабрь ойига келиб эса компаниянинг банкдаги улуши 23 фоизга етди.

“Инфинбанк”нинг асосий акциядори Фарҳод Мамажонов янги авиакомпания ташкил этди