Netflix Warner Bros. Discovery’нинг кино-студия, телевидение ва HBO Max стриминг хизматини ўз ичига олган активларини 82,7 млрд долларга сотиб олишини эълон қилди. Бу ҳақда New York Times хабар берди.

Битим нақд пул ва акциялардан иборат бўлиб, 2026 йилнинг учинчи чорагида, Warner Bros. Discovery кабель телеканалларини алоҳида компанияга ажратиб бўлгач ёпилиши кутилмоқда.

Бу қарор Голливуд учун катта ўзгариш бўлади. Netflix аллақачон 300 миллиондан ортиқ обуначига эга энг йирик стриминг платформаси, Warner Bros. активлари қўшилиши эса уни янада улкан ўйинчига айлантиради. Бу бирлашув компанияга кинотеатрлар, контент ишлаб чиқарувчилар ва касаба уюшмалари билан музокараларда кучлироқ позиция беради. Кичикроқ медиа компаниялар эса рақобатга дош бериш учун бирлашишга мажбур бўлиши мумкин.

Netflix’нинг катта харидга киришгани кўпчиликни ҳайратда қолдирди, чунки компания кўпроқ “ўзимиз яратамиз” фалсафасига амал қилиб келган. Шунга қарамай, Netflix Warner Bros. фильмларининг кинотеатрлардаги намойишларини давом эттиришга ваъда берди. Бу эса Netflix учун янгича ёндашувдир.

Warner Bros.’ни сотиб олишга Comcast ва Paramount ҳам ҳаракат қилаётган эди. Paramount раҳбари Девид Эллисон ҳатто Warner Bros. Discovery’ни CNN ва TNT каби телеканаллари билан бирга тўлиқ сотиб олишга уринаётган эди. Comcast эса студиялар ва HBO Max’га даъвогарлик қилган. Аммо якунда Netflix’нинг таклифи энг кучли бўлиб чиқди.

Сиёсий омиллар

Ҳар қандай йирик битим федерал регуляторларнинг розилигини талаб қилади. Trump маъмурияти бу масалада қандай қарор қилиши эса антимонополия масалаларини қандай талқин қилишига боғлиқ бўлади. Айниқса, Apple ва Amazon каби технологик гигантлар ҳам медиа бозорининг асосий рақобатчиларига айланган бир пайтда.

Сиёсий омиллар ҳам таъсир қилиши мумкин. Масалан, Paramount раҳбари Эллисон Трумп билан яхши муносабатга эга бўлса, аксинча Comcast бош директори Браян Робертс президент билан келишмай қолган. Трумп ҳатто уни омма олдида танқид қилган.

Кино ишлаб чиқарувчиларининг аноним гуруҳи Конгрессга мактуб йўллаб, Нетфлихнинг Warner Bros.ни сотиб олиши уларнинг фикрича кинотеатрлар келажаги учун хавф туғдиришини айтишди. Улар Нетфлихнинг стримингни биринчи ўринга қўйишини, натижада кинотеатр намойишлари зарар кўришини таъкидлаган.

Warner Bros. ва HBO ҳақида

Warner Bros. Голливуд тарихининг энг афсонавий студияларидан биридир. Унинг 100 йиллик кино кутубхонаси “Casablanca”, “The Maltese Falcon”, “The Shining”, “Dirty Harry” каби классик фильмларни ўз ичига олади.

Шунингдек, кўпчиликка маълум ва машҳур Гарри Поттер фильмлари ҳам Warner Bros.’га тегишли.

Сўнгги мавсумда студия кетма-кет саккизта йирик хит чиқарди. Раян Куглернинг “Sinners” ҳамда Пол Томас Андерсоннинг “One Battle After Another” фильмлари яқинлашиб келаётган Оскар маросимининг асосий даъвогарларидан бўлиши кутилмоқда.

HBO эса премиум телевидениенинг глобал етакчиси бўлиб қолмоқда. “Sopranos”, “The White Lotus”, “The Wire” каби лойиҳалар бутун дунё бўйлаб катта аудиторияга эга.

HBO Max Joins the Amazon Prime Channel Lineup

Агар битим амалга ошса, Netflix “Friends”, “Game of Thrones”, Bugs Bunny каби аллақачон шаклланган кучли брендлар, шунингдек, юзлаб йиллар давомида қадри йўқолмайдиган кино меросини қўлга киритади.

Шунингдек, Netflix DC Comics фильмларининг катта қисмини ўзиники қилади. Бу эса платформага катта миқдорда мухлислар оқимини олиб келади.

Netflix ўз платформасида “Stranger Things” каби янги хитлар яратган бўлса-да, узоқ муддатли, авлоддан-авлодга ўтадиган франшизалар уларга етишмаётганди.

Тарихий битим: Netflix Warner Bros.’ни $83 млрдга сотиб олади