Ўзбекистон Республикаси Миллий инвестиция жамғармаси (UzNIF) ўзининг бошланғич оммавий таклифини (IPO) расман бошлади. Таклиф доирасида компания акциялари ва глобал депозитар тилхатлари (GDR) инвесторларга тақдим этилмоқда.

Таклиф бугун 29-апрелдан бошланиб, 12-майга қадар давом этади. Таклиф нархи ҳар бир GDR учун 25 АҚШ доллари, оддий акция учун эса 4,65 сўм этиб белгиланган. Шу баҳолаш асосида компания умумий қиймати қарийб 1,95 млрд долларга тенг деб баҳоланмоқда.

IPO доирасида компания устав капиталининг тахминан 30 фоизи сотувга чиқарилмоқда, барча қимматли қоғозлар эса ягона акциядор — давлат номидан Иқтисодиёт ва молия вазирлиги томонидан таклиф этилмоқда. Бу эса IPOдан тушадиган маблағлар тўғридан-тўғри компанияга эмас, балки сотувчи акциядорга йўналтирилишини англатади.

Таклиф икки асосий йўналишда амалга оширилади. Биринчиси маҳаллий бозор бўлиб, унда акциялар Тошкент фонд биржаси орқали Ўзбекистон ва айрим бошқа ҳудудлардаги институционал ҳамда чакана инвесторлар учун таклиф этилади. Иккинчи йўналиш — халқаро бозор бўлиб, унда GDRлар хорижий институционал инвесторлар учун Лондон фонд биржасида жойлаштирилади.

Халқаро қизиқиш аллақачон шаклланган. Хусусан, BlackRock, Franklin Resources ва бошқа йирик фондлар умумий ҳисобда тахминан 300 млн долларлик GDR харид қилиш бўйича “cornerstone” келишувларга эришган.

Маҳаллий инвесторлар учун ҳам муҳим имтиёзлар назарда тутилган.

Жисмоний шахслар 12 млрд сўмгача бўлган буюртмалар бўйича 5 фоизлик чегирма билан акцияларни 4,41 сўмдан сотиб олиши мумкин. Чакана инвесторлар акцияларни маҳаллий брокерлар орқали ёки 200 млн сўмгача бўлган буюртмалар учун Jett платформаси орқали харид қилиши мумкин. Шу билан бирга, инвесторларга IPOда иштирок этиш учун олдиндан брокерлик ҳисобварақларини очиш тавсия этилмоқда.

Таклиф якунлари ва якуний тақсимот 13-май атрофида эълон қилинади. GDRлар бўйича шартли савдолар Лондон фонд биржасида 13-майдан бошланиши, тўлиқ савдолар эса 18-майдан йўлга қўйилиши кутилмоқда. Шу санадан бошлаб UzNIF акциялари Тошкент фонд биржасида ҳам эркин муомалага чиқарилади.

IPOнинг халқаро қисми Jefferies International Limited томонидан бош глобал координатор сифатида бошқарилмоқда, шунингдек бир қатор халқаро молиявий институтлар bookrunner сифатида жалб қилинган. GDR дастури бўйича депозитарий банк сифатида The Bank of New York Mellon тайинланган.

UzNIF Тошкент ва Лондон фонд биржаларида IPO бошланганини эълон қилди