Бу ҳақда Uzbekistan Airports’нинг корпоратив ахборот ягона порталида эълон қилинган муҳим фактида маълум қилинди.

Ҳужжатга кўра, компания кузатув кенгаши улушни сотиб олиш бўйича қарорни 17 июлда қабул қилган, мулк ҳуқуқи эса 7 августда юзага келган. Натижада Central Asia Megastar МЧЖдаги улуш 49 фоиз деб кўрсатилган.

Бошқа корпоратив очиқлашда улушнинг аниқ миқдори 48,88 фоиз сифатида қайд этилган. Шундан келиб чиқиб, 49 фоизлик кўрсаткич яхлитланган. Central Asia Megastar 7 августдан Uzbekistan Airports’нинг аффилланган шахслари рўйхатига ҳам киритилган.

Аэропортлар оператори компаниядаги дастлабки улушини 2022 йилда Uzbekistan Airways’дан сотиб олган. Ўшанда 23,3 фоизлик улуш учун 400,3 млн сўм тўланган эди. Шу тариқа, ҳозирги 48,88 фоизлик кўрсаткични дастлабки улуш билан таққослаганда, Uzbekistan Airports’нинг компаниядаги улуши 25,58 фоиз пунктга ёки қарийб 2,1 баравар ошган.

Central Asia Megastar Duty Free Uzbekistan тармоғи оператори ҳисобланади. 2022 йилдаги очиқ маълумотларга кўра, тармоққа Тошкент халқаро аэропортидаги 7 та дўкон ва 2 та бар, шунингдек, Самарқанд, Бухоро ва Урганч аэропортларидаги савдо нуқталари кирган.

Компания Тошкентда дипломатик ходимлар учун бож олинмайдиган дўкон ҳамда Термиз–Афғонистон божхона постидаги duty-free савдо нуқтасини ҳам бошқарган.

Давлат реестрига кўра ҳозирда компаниянинг қолган 51,1 фоиз улушига Premium Globe Investments МЧЖ эгалик қилмоқда. Ўз навбатида мазкур юридик шахснинг 100 фоиз улуши Хамидов Собир Тахировичга тегишли.

Uzbekistan Airports Duty Free Uzbekistan операторидаги улушини 49 фоизгача оширди