OpenAI 9 июль куни ChatGPT Work номли янги иш режимини тақдим этди. У оддий саволларга жавоб беришдан кўра, узоқроқ давом этадиган лойиҳалар ва якуний материалларни тайёрлашга мўлжалланган.

Фойдаланувчи Work’га керакли натижани тушунтиради, агент эса вазифани кичик босқичларга ажратиб, маълумотларни йиғади ва ишни бир неча соат давомида мустақил олиб бориши мумкин. Жараён давомида фойдаланувчи унинг ҳаракатларини кузатиши, қўшимча маълумот бериши, йўналишни ўзгартириши ва муҳим амалларни тасдиқлаши мумкин.

ChatGPT Work ёрдамида:

ҳужжат, ҳисобот ва таҳлиллар тайёрлаш;
электрон жадваллар, формулалар ва графиклар яратиш;
тақдимотларни ишлаб чиқиш ёки мавжуд шаблонга мослаштириш;
интерактив сайт ва ички иш панелларини яратиш;
такрорий вазифаларни автоматлаштириш мумкин.

Агент Slack, Microsoft Teams, Google Drive, SharePoint, электрон почта, календарь, CRM ва бошқа хизматлардаги маълумотлардан фойдаланиши мумкин. Бунинг учун тегишли плагин ёки иловага кириш рухсати берилиши керак. Desktop версияда Work фойдаланувчи рухсати билан компьютердаги маҳаллий файллар ва дастурлар билан ҳам ишлай олади.

Шунингдек, Scheduled Tasks функцияси орқали агентга вазифани маълум вақтда ёки бирор ҳодиса юз берганда бажариш топширилади. Масалан, у ҳар куни сайт ва бизнес панелларидаги ўзгаришларни текшириши, янги хабарлар асосида йиғилиш режасини янгилаши ёки электрон почта орқали келган фикрлар асосида тақдимотни қайта тайёрлаши мумкин.

Янги GPT-5.6 моделлари

ChatGPT Work OpenAI’нинг янги GPT-5.6 моделлар оиласи асосида ишлайди. У учта даражадан иборат:

GPT-5.6 Sol мураккаб профессионал вазифалар учун асосий модел;
GPT-5.6 Terra нарх ва имконият ўртасидаги мувозанатли вариант;
GPT-5.6 Luna тезкор ва нисбатан арзон модел.

OpenAI GPT-5.6 кўп босқичли вазифаларни бажариш, мавжуд шаблонларга мос ҳужжатлар яратиш, тақдимот ва интерфейслар ишлаб чиқишда аввалги моделларга нисбатан самаралироқ эканини маълум қилди.

Free ва Go фойдаланувчилари ChatGPT Work ҳамда Codex’да GPT-5.6 Terra’дан чекланган тартибда фойдаланиши мумкин. Plus, Pro, Business ва Enterprise тарифларида эса Sol, Terra ва Luna моделлари орасидан танлаш имконияти мавжуд.

Chat, Work ва Codex бир иловада

OpenAI янги ChatGPT desktop иловасида учта алоҳида режимни бирлаштирди. Chat оддий саволлар ва суҳбатлар, Work тадқиқот ҳамда тайёр материаллар яратиш, Codex эса дастурлаш ва техник вазифалар учун мўлжалланган.

Аввалги Codex desktop иловаси янги ChatGPT desktop иловасига бирлаштирилмоқда. Эски ChatGPT desktop дастури эса ChatGPT Classic номини олади. Янги илова Windows ва macOS учун глобал миқёсда барча тарифларга, жумладан Free фойдаланувчиларига ҳам тақдим этилган.

OpenAI маълумотига кўра, веб ва мобил Work булутда ишлайди, desktop версия эса рухсат берилганда компьютердаги маҳаллий файл ва дастурлардан фойдалана олади.

OpenAI GPT-5.6 асосида ишловчи ChatGPT Work агентини тақдим этди