OpenAI ChatGPT Translate деб номланган алоҳида веб-таржима хизматини ишга туширди. Бу ҳақда The Verge хабар берди.

Ушбу хизмат 50 дан ортиқ тилларни қўллаб-қувватлайди ва Google Translate’га бевосита рақобатчи сифатида тақдим этилмоқда. Иккала платформа ҳам ташқи кўриниш жиҳатидан бир-бирига жуда ўхшайди. Интерфейсда фойдаланувчи матн киритиши ёки нусха кўчириб жойлаши учун битта ойнача, таржима қилинган матнни кўрсатиш учун эса иккинчи ойнача мавжуд. Шунингдек, қайси тилдан қайси тилга таржима қилинишини танлаш учун очиладиган менюлар ҳам бор.

Бироқ, ушбу икки хизмат ўртасида муҳим фарқлар ҳам мавжуд. Масалан, Google Translate фойдаланувчиларга нафақат матн, балки расмлар, ҳужжатлар ва ҳатто веб-сайтларни ҳам таржима қилиш имконини беради. ChatGPT Translate’нинг бош саҳифасида эса у матн, расм ва овоз орқали таржима қила олиши кўрсатилган, аммо ҳозирча расм орқали таржима қилиш функцияси хизматнинг ҳеч бир версиясида ишламайди. Компьютер (десктоп) версияси фақат матн таржимасини қўллаб-қувватлайди, мобил браузерларда эса фойдаланувчилар матн киритиш ёки телефон микрофони орқали овозли таржимадан фойдаланишлари мумкин.

Бундан ташқари, OpenAI таржима услубини бошқариш учун махсус созламаларни ҳам қўшган. Масалан, фойдаланувчи таржимани “янада расмий” ёки “бизнес услубида” қилишни сўраши мумкин.

Аслида, ChatGPT чатботи таржима қилиш имкониятларига бир неча йилдан бери эга эди. Шу сабабли, ChatGPT Translate — бу OpenAI томонидан мавжуд функцияларни алоҳида веб-хизмат сифатида ажратиб чиқариш ҳисобланади.

Ҳозирча ChatGPT Translate’нинг Apple App Store ёки Google Play’да мобил иловаси мавжуд эмас. Google Translate эса ҳам веб-сайт, ҳам мобил илова кўринишида ишлайди. OpenAI ушбу хизматнинг расмий тақдимоти бўйича баёнот бермаган ва таржима воситаси қайси сунъий интеллект модели асосида ишлаётгани ҳам ҳозирча маълум қилинмаган.

OpenAI ChatGPT Translate номли алоҳида таржима хизматини ишга туширди