Apex Moliya акциядорлари ташкилотни фақат исломий банк фаолиятини амалга оширувчи микромолия банкига айлантиришга қарор қилди.

Бунинг учун компания Марказий банкдан дастлабки рухсат олиши керак. Жараён якунланса, Ўзбекистонда илк исломий микромолия банки пайдо бўлиши мумкин.

Apex Moliya акциядорларининг навбатдан ташқари умумий йиғилиши 2026 йил 14 июлда ўтказилган. Унда ташкилот фаолиятини исломий микромолия банкига ўзгартириш таклифи йиғилишда қатнашган акциядорларнинг овози билан бир овоздан маъқулланган.

Йиғилишда янги банкнинг устави, бизнес-режаси ва ташкилий тузилмаси тасдиқланган. Бундан ташқари, кузатув кенгаши, беш кишидан иборат бошқарув ҳамда исломий молия кенгаши таркиби шакллантирилган.

Исломий молия кенгашига Қирғизистондаги “Alhamd Eurasia Sharia Advisory Services” компанияси директори Акжигит Кокоев раис этиб белгиланган. Кенгаш таркибига Ўзбекистон мусулмонлари идорасининг икки мутахассиси ҳам киритилган.

Энди Apex Moliya Марказий банкка исломий микромолия банкини ташкил этиш учун дастлабки рухсатнома олиш бўйича мурожаат қилиши керак. Рухсат олинганидан кейин ташкилот устав капиталини қўшимча акциялар чиқариш орқали 50 млрд сўмга етказишни режалаштирган.

Бироқ акциядорларнинг қарори ташкилот банкка айланганини англатмайди. Марказий банк маълумотларида Apex Moliya ҳозирча 108-сонли лицензияга эга микромолия ташкилоти сифатида қайд этилган.

Apex Moliya айни пайтда Ўзбекистондаги исломий микромолиялаштириш бозорининг энг йирик иштирокчиси ҳисобланади.

Ташкилот 2026 йилнинг биринчи чорагида 8,4 млрд сўмлик исломий молиялаштириш хизматларини кўрсатган. Бу микромолия ташкилотлари томонидан кўрсатилган жами 11,2 млрд сўмлик хизматларнинг 75 фоизига тенг.

Исломий микромолия банкларини ташкил этиш учун ҳуқуқий асос 2026 йилда яратилди. 29 июндан кучга кирган қонунга кўра, микромолия ташкилоти бундай банкка айланиши учун акциядорлик жамияти шаклида фаолият юритиши ҳамда исломий молия стандартларига мос келмайдиган актив ва мажбуриятлардан воз кечиши керак.

Шунингдек, Марказий банкнинг 17 июлдаги қарори билан “Банк фаолиятига рухсат бериш тартиби ва шартлари тўғрисида”ги низомга киритилган ўзгартириш ва қўшимчалар исломий микромолия банкини ташкил этиш, унга дастлабки рухсат бериш ва лицензиялаш тартибини белгилаб берди.

Марказий банкнинг амалдаги банклар рўйхатида “Таянч микромолия банки” мавжуд, бироқ исломий микромолия банки қайд этилмаган. Шу сабабли Apex Moliya тегишли рухсат ва лицензияларни олса, ушбу мақомдаги биринчи банк бўлиши мумкин.

Apex Moliya илк исломий микромолия банкига айланишни режалаштирмоқда