Марказий банкнинг 2026 йил биринчи чораги бўйича истеъмол кайфияти шарҳига кўра, аҳолининг кредитга бўлган эҳтиёжи аввалги чоракка нисбатан ошган.

Келгусида кредит олишга эҳтиёжи борлигини билдирган респондентлар улуши 56 фоизга етди. Олдинги чоракда бу кўрсаткич 54 фоизни ташкил этган эди.

Жумладан, респондентларнинг 27 фоизи кредитга эҳтиёжи сезиларли, 29 фоизи эса бироз ошишини кутмоқда. Яна 31 фоиз иштирокчи кредитга бўлган талаби ўзгармаслигини билдирган.

Кредитга талаб, айниқса, ойлик даромади 7 млн сўмгача бўлган аҳоли гуруҳларида ошиши мумкин. Даромади 10–15 млн сўм ҳамда 20 млн сўмдан юқори бўлган респондентлар орасида эса кредитга талабнинг пасайиш тенденцияси давом этган.

Сўров қатнашчилари кредит маблағларини асосан уй-жойни таъмирлаш, таълим, тўй, автомобиль хариди ва даволаниш билан боғлиқ харажатларга йўналтиришни режалаштирган.

Жамғаришга мойиллик ошмоқда

2026 йилнинг биринчи чорагида аҳолининг пул маблағларини жамғаришга бўлган мойиллиги ҳам ошган.

Респондентларнинг 65,8 фоизи келгусида жамғармалари кўпайишини кутмоқда. Бу 2025 йилнинг тўртинчи чорагига нисбатан 3,2 фоиз бандга юқори.

Жамғармалари ҳажми ўзгармаслигини кутаётганлар улуши 22,3 фоизни ташкил этди. Жамғармалари камайишини тахмин қилган респондентлар улуши эса 13,2 фоиздан 11,9 фоизгача қисқарди.

Шу билан бирга, сўров қатнашчиларининг 40,1 фоизи ҳозирда жамғармаси мавжуд эмаслигини билдирган. Ушбу кўрсаткич аввалги чоракка нисбатан бироз камайган.

Жамғармаси 1–3 ойга ёки олти ойдан ортиқ муддатга етишини билдирган респондентлар улуши ошган. Жамғармаси бир ойгача ёки 3–6 ойга етишини қайд этганлар улуши эса камайган.

Сўров иштирокчиларининг 58 фоизи биринчи чоракда молиявий ҳолати яхшилангани ёки бироз яхшиланганини билдирган. Молиявий аҳволида ўзгариш сезмаганлар улуши 32,4 фоизни, ҳолати ёмонлашганини қайд этганлар улуши эса 9,7 фоизни ташкил этган.

Натижалар аҳолининг жамғаришга мойиллиги кучаяётганини кўрсатади. Бироқ кредитга эҳтиёжнинг ошиши ва респондентларнинг 40 фоизида жамғарма йўқлиги молиявий захиралар барча қатламларда бир хил шаклланмаётганини англатади.

Ўзбекистонда аҳолининг кредитга бўлган эҳтиёжи 56 фоизга етди