Ўзбекистон республика товар-хомашё биржасида пропан нархи икки кун ичида қарийб 65 фоизга ошиб, тарихий максимумни янгилади.

16 сентябр куни бир тонна суюлтирилган газнинг ўртача нархи 7,412 млн сўмни ташкил этган. 17 сентябрда у бир куннинг ўзида 60,6 фоизга ошиб, 11,905 млн сўмга етган.

18 сентябрда пропан яна 2,6 фоизга қимматлашиб, бир тоннаси 12,217 млн сўмдан сотилган. Натижада икки кунлик ўсиш 4,8 млн сўм ёки қарийб 65 фоизни ташкил этган.

Шу даврда сотилган пропан ҳажми ҳам 666 тоннадан 1 114 тоннагача ошган. Бу 67,2 фоизлик ўсишни англатади.

Нархларнинг кескин кўтарилиши биржа савдоларидаги чеклов бекор қилиниши ортидан юз берди. Президентнинг 12 сентябрдаги ПҚ–326-сон қарори билан суюлтирилган газнинг савдо давомида бошланғич нархга нисбатан қанчагача қимматлашиши мумкинлигини белгиловчи чеклов олиб ташланди.

Аввал пропаннинг биржадаги нархи бошланғич қийматдан кўпи билан 10 фоизга ошиши мумкин эди. Шу билан бирга, ишлаб чиқарувчилар ва импортчиларнинг бир тонна пропанни 7,5 млн сўмдан қимматроқ бошланғич нархда савдога чиқаришига рухсат берилмаган.

Натижада амалдаги тартиб бўйича пропаннинг биржадаги энг юқори нархи 8,25 млн сўм билан чекланарди. 17 сентябрдан савдо жараёнидаги ўсиш чегараси бекор қилинди, бироқ 7,5 млн сўмлик бошланғич нарх чеклови сақланиб қолди.

Пропан нархининг биржада ошишига қарши чеклов илк бор 2024 йил ноябрида жорий этилган эди. Ўшанда суюлтирилган газнинг нархи 10,1 млн сўмдан ошгач, савдо давомидаги ўсиш бошланғич нархнинг 20 фоизи билан чекланган.

2026 йил 12 январдан эса мазкур чеклов 20 фоиздан 10 фоизга туширилган эди. Эндиликда пропан нархи биржа савдоларидаги талаб ва таклиф асосида шаклланади.

Ўзбекистонда пропан нархига чеклов бекор қилингач, нархлар 65 фоизга ошди