Microsoft акциялари 31 июль куни кескин кўтарилиб, компаниянинг бозор қийматини $4 трлндан оширди. Бу натижа уни тарихда бу маррани забт этган иккинчи компанияга айлантирди.

Бозор очилгач, Microsoft’нинг (MSFT) акциялари деярли 4,5 фоизга кўтарилди ва компаниянинг биржа қиймати $4,01 трлнга етди. Умуман олганда, йил бошидан буён Microsoft акциялари қарийб 28 фоизга ошган.

Microsoft илк бор 1 триллион долларлик бозор баҳосига 2019 йил апрелида етган эди. Бироқ, Microsoft’нинг 3 трлнлик маррани забт этиши Nvidia ва Apple’га қараганда узоқроқ вақт олди. Компания бундан бир ярим йил олдин ушбу қийматга чиққан.

Эндиликда Microsoft Nvidia’дан кейин 4 триллион долларлик баҳога эга бўлган иккинчи компания. Nvidia ушбу маррага жорий йилнинг июль ойи бошида етган эди.

Microsoft’нинг OpenAI билан қилган миллиардлаб долларлик ҳамкорлиги ўз самарасини бермоқда. ChatGPT 2022 йил охирида тақдим этилганидан бери Microsoft акциялари икки баравар ошган. Компания OpenAI’нинг илғор сунъий интеллект моделлари орқали ўзининг Office дастурлари ва Azure булут хизматларини янада кучайтирмоқда.

Айниқса, Azure хизматларининг даромади сезиларли даражада ўсди. Таҳлилчилар фикрича, Microsoft 365 дастур тўпламига жорий қилинган Copilot сунъий интеллект чатботи ҳам бу ўсишда муҳим роль ўйнаган.

Microsoft янги молиявий йилнинг биринчи чорагидаёқ AI лойиҳалари учун $30 млрд сарфлашни режалаштирмоқда.

Microsoft $4 трлнлик бозор қийматига эришган иккинчи компанияга айланди