2025 йил августида мамлакат автомобиль бозорида савдолар бироз қисқарди. Бу ҳақда Иқтисодий тадқиқотлар ва ислоҳотлар маркази маълум қилди.

Маълумотларга кўра, ой давомида енгил автомобиллар савдоси 90 минг донани ташкил этиб, июль ойига нисбатан 9,5% га камайди. Энг сезиларли пасайиш Тошкент вилояти, Хоразм ва Қашқадарёда қайд этилди.

Бирламчи бозор

Янги енгил автомобиллар сегментида ҳам пасайиш кузатилди. Август ойида 37,6 минг дона автомобиль сотилиб, бу июль ойига қараганда 2% камдир. Шунга қарамай, маҳаллий ишлаб чиқарилган автомобиллар бозорда етакчиликни сақлаб қолди — 32,6 минг дона машина сотилган бўлиб, бу кўрсаткич 0,8% га қисқарди. Импорт қилинган янги автомобиллар савдоси эса 4,9 минг донани ташкил этди, бу июлга нисбатан 9,4% кам.

Иккиламчи бозор

Автомобиль бозорининг иккиламчи сегментида ҳам савдо ҳажми қисқарди. Август ойида 52,7 минг дона автомобиль сотилган бўлиб, бу ўтган ойга нисбатан 14,3% камдир.

Электромобиллар

Шу билан бирга, электромобиллар сегменти ижобий динамикани кўрсатди. Иккиламчи бозорда 2,7 мингта электромобиль сотилди, бу июлга нисбатан 0,6% кўп. Йиллик ҳисобда эса савдолар 4,6 баробар ошгани қайд этилди.

Ўзбекистон автомобиль бозорида август ойида пасайиш кузатилди