Ўзбекистоннинг етакчи супермаркет тармоқларидан бири Корзинка $110 миллион миқдорида сармоя жалб қилганини эълон қилди.

Ушбу инвестиция Abu Dhabi Uzbek Investment (ADUI) ва Ўзбекистон – Ўмон Инвестиция Компанияси (UzOman) каби йирик инвесторлар томонидан йўналтирилади.

Янги сармоя Корзинканинг кўп каналли чакана савдо моделини ривожлантириш ва дўкон тармоғини кенгайтиришга хизмат қилади. Хусусан:

Супермаркет тармоғини мустаҳкамлаш ва кенгайтириш;
Корзинка Маҳалла – уй яқинидаги кичик форматли дўконлар сонини ошириш;
Korzinka Go – бозорда етакчи бўлган электрон тижорат платформасини ривожлантириш.

Шунингдек, компания замонавий инфратузилмага сармоя киритмоқда. Жумладан, 2025 йилнинг иккинчи ярмида ишга туширилиши режалаштирилган 49 000 м² майдонга эга янги тақсимот маркази бунёд этилмоқда.

Корзинка асосчиси ва Кузатув кенгаши раиси Зафар Ҳошимов ушбу келишув ҳақида шундай деди:

“Янги акциядорларимизни мамнуният билан кутиб оламиз. Ушбу йирик сармоя Корзинканинг улкан ўсиш режалари амалга ошишига хизмат қилади. Биз бизнесимизни кенгайтиришда давом этамиз ва Ўзбекистон озиқ-овқат чакана савдосининг келажагини шакллантиришга ўз ҳиссамизни қўшишда давом этамиз.”

Инвесторлар ҳам Корзинканинг келажагига катта умид билдиришмоқда. ADUI бош директори Сарвар Ҳамидов ушбу сармояни “Ўзбекистондаги иқтисодий ўсишни рағбатлантирувчи инвестицияларнинг бир қисми” деб баҳолади.

UzOman бош директори Омар Баҳрам эса Корзинкани “Ўзбекистон чакана савдо саноатини янги босқичга олиб чиқадиган компания” сифатида таъкидлади.

ЕТТБ вакили Тамас Надж эса 2020 йилдаги инвестициядан сўнг Корзинка “барқарор ўсиш ва корпоратив бошқарув стандартларининг жорий этилиши билан ажралиб турган компания” эканини қайд этди.

Корзинка ҳозирда Ўзбекистон бўйлаб 150 дан ортиқ дўконга эга бўлиб, янги инвестиция компанияга дўконлар сонини 1000 тагача ошириш, электрон савдо платформасини ривожлантириш ва логистика инфратузилмасини модернизация қилиш имконини беради.

️Корзинка 3 та ташкилотдан $110 миллионлик сармоя жалб қилмоқда