Олтин нархи кетма-кет рекорд даражаларни янгилаганидан сўнг сезиларли пасайишни бошлади. 30 январь куни тушдан кейин қимматбаҳо металл нархи 5 000 доллардан пастга тушиб кетди.

Бир кун аввал олтиннинг бир унцияси 5 555 доллар атрофида савдо қилинаётган эди. Кун давомида нархлар 500 доллардан кўпроққа пасайди, жорий сессияда эса тушиш 7,6 фоизни ташкил этди. Савдолар чоғида энг паст нарх 4 950 долларгача етди.

Хабар тайёрланаётган пайтда (14:49, Тошкент вақти) олтиннинг бир унцияси 4 990 доллардан сотилмоқда. Бир грамм соф олтин нархи эса 160,4 долларни ташкил этмоқда.

Бунга қадар Ўзбекистонда олтин қуймалари жаҳон бозоридаги тенденциялар билан синхрон равишда қимматлашиб келаётган эди. Глобал бозорда нархлар кескин пасайганини инобатга олсак, эртага ички бозорда ҳам олтин нархининг пасайиши эҳтимоли юқори.

Нега нархлар тушмоқда?

Кеча олтин нархи бир унция учун 5 594 доллардан ошиб, тарихий рекордни қайд этганди. Нархларнинг бундай тез ва кескин ўсиши инвесторлар томонидан фаол фойда олиш (профит-такинг) жараёнини бошлаб берди. Натижада бозор кескин, аммо қисқа муддатли тузатишга дуч келди.

Бундан ташқари, олтин АҚШ долларида баҳоланади. Доллар курси мустаҳкамланганда, бошқа валюталарда ҳисоб-китоб қилувчи инвесторлар учун олтин қимматроқ кўринади, бу эса талабни пасайтириб, нархларга босим ўтказади. Сўнгги кунларда доллар кўп йиллик энг паст даражаларидан қисман тиклана бошлади.

Жонли олтин нархи билан қуйида танишишингиз мумкин:

Jonli Oltin Narxi

Шунга қарамай, 2026 йил 29–30 январь кунларидаги кескин тебраниш ва пасайишларга қарамасдан, аксарият таҳлилчилар олтиннинг узоқ муддатли истиқболини ижобий (буллиш) деб баҳоламоқда. Бунга глобал иқтисодий ноаниқликлар, геополитик хатарлар ва марказий банклар томонидан олтинга бўлган кучли талаб асосий омил бўлиб қолмоқда.

Қайд этиш жоиз, жорий тузатишдан олдин олтин нархи сўнгги бир йил ичида аллақачон 98 фоиз ўсишга эришган эди.

Аввалроқ Pinkod Bitcoin нархи сўнгги икки ойдаги энг паст даражага тушиб кетгани ҳақда ёзган эди.

Рекорддан қулаш: олтин нархи 5 000 доллардан пастга тушди