InFinBank акциядорлари иқтисодчи Ботир Қобиловни банк кузатув кенгашининг мустақил аъзоси этиб сайлади. Унинг ваколати 9 октябрдан бошланиб, уч йиллик муддат якунида ўтказиладиган акциядорларнинг йиллик умумий йиғилишигача давом этади.

Қарор банк акциядорларининг 8 октябрь куни ўтказилган навбатдан ташқари умумий йиғилишида қабул қилинган. Қобилов кузатув кенгашида Шуҳрат Мирзараҳимов ўрнини эгаллади.

Ботир Қобилов 2024 йилдан буён АҚШнинг Техас университети Даллас кампусида бухгалтерия ҳисоби бўйича ассистент-профессор сифатида ишлайди. У 2024 йилда Ҳарвард бизнес мактабида PhD даражасини олган, Дюк университетида иқтисодиёт бўйича магистратура ҳамда Тошкентдаги Сингапур менежментни ривожлантириш институтида банк иши ва молия йўналишида бакалавриатни тамомлаган.

Иқтисодчи аввал Ўзбекистон Марказий банкида етакчи иқтисодчи сифатида ишлаган. Ҳозир у Марказий банк ҳузуридаги Тадқиқот кенгаши аъзоси ҳам ҳисобланади.

Иқтисодчи Ботир Қобилов InFinBank кузатув кенгаши таркибига кирди