Йирик банклар: 2026 йилда олтин нархи 6 000 доллардан ошиши мумкин
Глобал иқтисодий ноаниқлик, геосиёсий хатарлар ва доллар заифлашуви фонида йирик халқаро банклар 2026 йил учун олтин нархи бўйича прогнозларини қайта кўриб чиқди.
Айрим молиявий институтлар бир унция олтин нархи 6 000 доллар ёки ундан ҳам юқори даражага етиши мумкинлигини таъкидламоқда.
Яқинда бир қатор йирик банклар 2026 йил учун олтин нархи бўйича прогнозларини янгилади. Глобал иқтисодий ноаниқлик, марказий банкларнинг фаол харидлари, геосиёсий кескинликлар ва АҚШ долларининг заифлашуви фонида айрим банклар бир унция олтин нархи $6 000 ёки ундан юқори бўлишини кутмоқда.
6 000 доллар ва ундан юқори прогнозлар
J.P. Morgan — 2026 йил охири учун олтин прогнозини кескин ошириб, 6 300 доллар/унция деб белгилади (аввал ~5 000–5 055 доллар). Банкка кўра, марказий банклар (2026 йилда тахминан 800 тонна) ва инвесторлар талаби кучли бўлиб қолади.
Олтин долларга боғлиқ бўлмаган, реал актив сифатида захиралар ва портфелларда муҳим ўрин эгалламоқда. Банк 2026 йил якунида ўртача нарх 5 055 доллар бўлишини, 2027 йилда эса ўсиш давом этишини тахмин қилмоқда. Агар хусусий инвесторлар олтин сармоясини кескин оширса, узоқ муддатда 8 000–8 500 долларгача чиқиши ҳам мумкин.
Айни пайтдаги жонли олтин нархи билан қуйида танишиш мумкин:
Bank of America — энг дадил прогноз билан чиқмоқда. Банкка кўра, олтин 2026 йил баҳоридаёқ 6 000 долларга етиши мумкин. Бу баҳо аввалги олтин ўсиш даврларидаги тажрибага асосланади — тарихда олтин кучли трендга киргач, қисқа вақт ичида тез кўтарилган. Стагфляция хавфи, АҚШнинг ноанъанавий бюджет сиёсати ва инвесторларнинг хавфсиз активларга ўтиши бу ўсишни қўллаб-қувватлаётгани айтилади.
Deutsche Bank — 2026 йилда олтин нархи $6 000/унция бўлишини прогноз қилмоқда. Асосий омиллар сифатида марказий банклар томонидан барқарор талаб ва инвесторларнинг доллардан ташқари активларга ўтишини келтиради. Доллар заифлашган муҳитда бу даражага эришиш мумкин, муқобил сценарийларда эса нарх $6 900 гача чиқиши мумкин.
Société Générale — 2026 йил охирига $6 000/унция прогноз қилмоқда ва агар хавфсиз активларга оқим ҳамда доллар заифлиги ҳозирги суръатда давом этса, бу баҳо ҳам консерватив бўлиши мумкинлигини таъкидлайди.
UBS — 2026 йил март, июнь ва сентабр ойларига мўлжалланган прогнозини $6 200/унцияга оширди. Банк буни кутилганидан кучлироқ бўлган талаб билан изоҳлайди.
6 000 доллардан пастроқ прогнозлар
Goldman Sachs — 2026 йил охири учун прогнозни 1 унция учун 5 400 долларга кўтарди (аввал 4 900 доллар). Банкга кўра, хусусий инвесторлар ва ривожланаётган давлатлар марказий банкларининг олтин хариди талабни барқарор қилмоқда. Агар бу жараён давом этса, нарх янада юқорилаши мумкин.
Morgan Stanley — асосий қараш эҳтиёткор, аммо қулай шароитда 2026 йил иккинчи ярмида олтин 5 700 долларга чиқиши мумкин. Ўртача прогнозлар 4 600–4 800 доллар атрофида. Хатарлар камайса, нарх пасайиши эҳтимоли ҳам бор.
HSBC — 2026 йил бошида олтин 5 000–5 050 долларга етишини кутмоқда. Бироқ йил бўйича ўртача нарх 4 587 доллар, йил охири эса 4 450 доллар бўлиши мумкин. Нархлар кескин тебраниши кутилмоқда.
Citi Bank — Узоқ муддатда эҳтиёткор позицияда. Айрим геосиёсий ва иқтисодий хатарлар 2026 йилда юмшаши мумкин, бу нарх ўсишини чеклайди. Ижобий сценарийда эса 2026 йил охирида олтин 5 000 долларга чиқиши мумкин.
Умуман олганда, айрим банклар 6 000 доллардан юқори баҳоларни айтаётган бўлса-да, кўпчилик олтин бозори узоқ муддатда ўсиш йўлида эканига ишонмоқда.
