Яқин Шарқдаги ноаниқликлар фонида олтин нархи кўтарилмоқда, Bitcoin нархи эса сезиларли тушиб кетди
13 июнь кунги савдо сессияларида олтин нархи 1 унция учун $3,425 даражасига етиб, охирги бир неча ойдаги энг юқори нуқтани забт этди.
Bitcoin нархи эса бир кечада 4 фоиздан кўпроққа тушиб, 24 соат ичидаги энг юқори кўрсаткич — $108,500 дан $103,556 гача пасайди.
Яқин Шарқдаги кескин геосиёсий вазият глобал молия бозорларига кучли таъсир ўтказмоқда. Хусусан, инвесторларнинг хавфсиз активларга бўлган талабининг ортиши фонида олтин нархи 2025 йилнинг энг юқори чўққиларидан бирига етди, Bitcoin эса кескин пасайди.
13 июнь кунги савдо сессияларида олтин нархи 1 унция учун $3,425 даражасига етиб, охирги бир неча ойдаги энг юқори нуқтани забт этди. Бу кўтарилишнинг асосий сабаблари орасида Исроил ва Эрон ўртасидаги ҳарбий кескинликнинг кучайгани ҳамда АҚШ Федерал резерв тизимининг (Fed) фоиз ставкасини тушириши кутилаётгани мавжуд. Мазкур омиллар инвесторлар орасида хавотирни кучайтириб, капитал оқимини хавфсиз деб кўриладиган олтинга йўналтиришга ундамоқда.
Zanier Metals компаниясининг витсе-президенти ва катта металлар стратегисти Питер Грант бу вазиятга қуйидагича изоҳ берди:
"Олтин нархи геосиёсий хавф-хатарлар кучайган бир пайтда кетма-кет иккинчи кун кўтарилмоқда. Агар у $3,400 даражасини яна босиб ўтса, $3,417 ва $3,431 даражаларидаги кичик техник тўсиқлар қолади. Аммо, бу — янги тарихий рекордларга йўл очиши мумкин".
Геосиёсий танглик крипто валюталарга ҳам таъсир қилди. Пайшанба куни кечқурун Исроил Эроннинг Теҳрон ва Табриз шаҳарлари яқинидаги ҳарбий инфратузилмасига ҳаво ҳужумларини амалга оширди. Расмий Тел-Авив бу ҳужумни олдиндан огоҳлантирувчи зарба деб атаб, Эрон томонидан бўлиши мумкин бўлган таҳдидларга жавоб сифатида изоҳлади.
Натижада, Bitcoin нархи бир кечада 4% дан кўпроққа тушиб, 24 соат ичидаги энг юқори кўрсаткич — $108,500 дан $103,556 гача пасайди (CoinGecko маълумотларига кўра). Бу ҳолат инвесторлар орасида хавфли активлардан қочиш кайфиятининг кучайганини кўрсатади.
