Хасан Рахматов Asia Alliance Bank кузатув кенгаши раиси этиб сайланди
Иқтисод фанлари доктори Рахматов Хасан Уткирович бунга қадар “Пойтахт банк” АЖ бошқаруви раиси лавозимида фаолият юритиб келаётган эди.
Рахматов Хасан Уткирович 1985 йил 13 сентябрда Самарқанд вилоятида зиёли оилада туғилган. 2006 йил Тошкент молия институтининг бакалавр босқичини, 2008 йил ушбу институтнинг магистратура босқичини тамомлаган. 2011 йилда “Иқтисод фанлари номзоди”, 2020 йилда “Иқтисод фанлари доктори” илмий даражаларини олган.
У меҳнат фаолияти давомида 2008-2013 йилларда АТ “Алоқабанк”да, 2013-2016 йилларда Ўзбекистон Республикаси Марказий банкида турли лавозимларда, хусусан, раҳбарлик лавозимларида ишлаган.
Шунингдек, Х.Рахматов 2016 йилдан 2024 йилгача АТ “Алоқабанк” бошқарув раиси ўринбосари лавозимида фаолият юритган. 2024 йил 24 январдан буён “Пойтахт банк” АЖ бошқарув раиси сифатида ишлаб келаётганди.
Х.Рахматовнинг билими, соҳадаги кўп йиллик тажрибаси ва ишбилармонлиги натижасида “Пойтахт банк” жамоаси қисқа вақт ичида бир қатор ютуқларга эришиб, янги хизматларни йўлга қўйишга ҳамда хусусийлаштириш жараёнини муваффақиятли якунлашга эришди.
